MİLLİ MƏCLİSDƏ BEYNƏLXALQ EKOLOGİYA KONFRANSININ İŞTİRAKÇILARI İLƏ GÖRÜŞ KEÇİRİLMİŞDİR
Mayın 3-də Milli Məclisdə Azərbaycan Parlamentinin bir qrup deputatı “Azərbaycanın milli mədəni və təbii irsinin qorunub saxlanılması - milli parklar proqramı” mövzusunda keçirilən beynəlxalq konfransın işində iştirak etmək üçün ətraf mühit, təbiətin mühafizəsi və nüvə reaktorlarının təhlükəsizliyi nazirinin müavini xanım Hila Altmanın başçılığı ilə Bakıya gəlmiş AFR nümayəndə heyətinin üzvləri ilə görüşmüşdür.
Milli Məclisin deputatı, akademik Cəlal Əliyev görüşü açaraq, konfransın işini yüksək qiymətləndirdi və bildirdi ki, bu görüşdə ekologiya problemləri ilə fəal məşğul olan deputatlar iştirak edirlər.
Cəlal Əliyev ekologiya və təbii ehtiyatlar sahəsində Azərbaycan elminin əldə etdiyi nailiyyətlərə toxunaraq dedi ki, sivilizasiyanın inkişafında bu problemin böyük əhəmiyyətini nəzərə alan alimlərimiz geniş tədqiqatlar aparırlar. Lakin genetik ehtiyatların tükənməsi bəşəriyyət üçün daha narahatedici problemdir. Çünki digər təbii ehtiyatlardan fərqli olaraq, onların əvəzini tapmaq mümkün deyildir. Ona görə də Azərbaycanda elmin genetik ehtiyatların öyrənilməsini, qorunmasını və onlardan səmərəli istifadə edilməsini əhatə edən sahəsinin inkişafına böyük əhəmiyyət verilir. Azərbaycan Prezidenti Heydər Əliyev bu problemin mühümlüyünü nəzərə alaraq, bioloji müxtəlifliyin genetik ehtiyatlarına dair dövlət komissiyası yaratmışdır. Hazırda elmin bu sahəsində tədqiqatlar aparan Azərbaycan alimləri 94 beynəlxalq institutla uğurlu əməkdaşlıq edir, Milli Elmlər Akademiyasının altı elmi tədqiqat institutunda təbii mikroorqanizmlər üzrə elmi araşdırmalar aparılır. Bütün bu elmi müəssisələr və Kənd Təsərrüfatı Nazirliyinin 15 elmi tədqiqat institutu öz səylərini Milli Elmlər Akademiyası ətrafında birləşdirmişlər. MEA-nın Rəyasət heyəti Genetik Ehtiyatlar İnstitutu yaratmağı nəzərdə tutur. Ölkəmizdə bu sahədə genetik bank yaradılır, dünyanın müxtəlif institutları ilə birgə ekspedisiyalar təşkil edilir.
Xanım Hila Altman Cəlal Əliyevin genetika sahəsində xidmətlərini yüksək qiymətləndirərək dedi ki, Azərbaycanda milli mədəni və təbii irsin qorunub saxlanılması sahəsində böyük iş görülmüşdür. O, ekoloji problemlərin geniş kütlə arasında təbliğ olunmasının vacibliyini də vurğulayaraq, bu problemlərin həll edilməsində Almaniyanın Azərbaycana hər cür kömək göstərməyə hazır olduğunu bildirdi.
Görüşdə Ermənistanın işğal etdiyi Azərbaycan torpaqlarında radioaktiv tullantıların basdırılması, ölkəmizin ərazisindən axan çaylara atılması, Ermənistan AES-ın ətraf mühitə təhlükə yaratması məsələlərinə də toxunuldu.
Almaniya parlamentinin nümayəndəsi Kristian Ruk görüşdə çıxış edərək bildirdi ki, onun ölkəsi sərhədlərin toxunulmazlığı prinsipinin pozulmasını, Azərbaycan torpaqlarının bir hissəsinin Ermənistan tərəfindən işğal edilməsini pisləyir və respublikamızın ərazi bütövlüyünü dəstəkləyir.
Görüşdə Almaniyanın Bakıdakı səfiri Klaus Qrevlix iştirak edirdi.
Bölmənin digər xəbərləri
