MİLLİ MƏCLİSDƏ GÖRÜŞ
Milli Məclisin sədri Murtuz Ələsgərov mayın 9-da Almaniya Bundestaqının Avropa Birliyi məsələlərinə dair komissiyasının sədri Fridbert Pflyügeri qəbul etmişdir.
Murtuz Ələsgərov qonağı səmimiyyətlə salamlayaraq, Almaniyanın hörmətli siyasətçisinin Cənubi Qafqaz ölkələrinə səfərinin böyük əhəmiyyəti olduğunu bildirdi.
Milli Məclisin sədri Almaniya ilə Azərbaycan arasında münasibətlərin inkişafından danışaraq vurğuladı ki, qarşılıqlı surətdə faydalı əlaqələrimizin əsası hələ 1996-cı ildə, Azərbaycan Prezidenti Heydər Əliyevin Almaniyaya dövlət səfəri zamanı qoyulmuşdur. Bu səfər zamanı imzalanmış sənədlər ölkələrimiz arasında əməkdaşlığın hüquqi bazasını yaratmışdır. Dövlətimizin başçısı AFR-in kansleri Gerhard Şröderlə 1999-cu ildə, ATƏT-in İstanbul sammiti zamanı da görüşmüş, həmin görüşdə incəsənət əsərlərinin Bremen muzeyinə qaytarılması haqqında sənəd imzalanmışdır.
Dövlət başçıları ilə yanaşı, ölkələrimizin parlament üzvləri də görüşmüşlər. Azərbaycan parlamentinin nümayəndə heyəti 1997-ci ildə, Berlində Bundestaq binasının açılışı ilə bağlı şənliklərdə iştirak etmiş və Almaniya parlamenti komissiyalarıının sədrləri də Bakıda bir sıra görüşlər keçirmişlər. Almaniyanın qanunvericilik orqanının nümayəndələri də qanun yaradıcılığı sahəsində əməkdaşlığın inkişafı ilə bağlı fikir mübadiləsi aparmışlar.
Sonra Murtuz Ələsgərov Azərbaycanın AŞPA, NATO-nun Parlament Assambleyası və QİƏT-in Parlament Assambleyası kimi nüfuzlu beynəlxalq təşkilatlarla əməkdaşlığından ətraflı danışdı. Ölkəmiz Avropa Birliyi ilə tərəfdaşlıq haqqında saziş imzalamışdır. Bu sənəd əsasında münasibətlərimizi tənzimləyən xüsusi komitə yaradılmışdır. Komitənin 1997-ci ildə Brüsseldə keçirilən birinci iclasında Avropa Birliyi ölkəmizə bir sıra tövsiyələr vermişdir. Bu mühüm qurumun çari ilin fevralında keçirilmiş sonuncu, üçüncü iclası da əməkdaşlığın inkişafında mühüm rol oynamışdır.
Milli Məclisin sədri Ermənistan-Azərbaycan, Dağlıq Qarabağ münaqişəsinin nizama salınması məsələsinə toxunaraq,
bu problemin həlli prosesində Almaniyanın mühüm rol oynadığını vurğuladı. O, qaçqınlara göstərdiyi humanitar və texniki yardıma görə də AFR hökumətinə təşəkkürünü bildirdi.
Fridbert Pflyüger səmimi qəbula görə təşəkkürünü bildirərək dedi ki, o, faşizm üzərində Qələbə günü münasibətilə keçirilən tədbirdə iştirak etmişdir. Bu qələbəni alman xalqı da bayram edir və hesab edir ki, müharibəni Hitler Almaniyası uduzmuşdur, azad Almaniya isə qalib gəlmişdir.
Qonaq xalqlarımız arasında əlaqələrdən danışaraq vurğuladı ki, bu münasibətlər hələ sovet hakimiyyətindən əvvəl mövcud olmuşdur. O vaxta qədər, Azərbaycanda 50 minə yaxın alman yaşayırdı. Azərbaycan müstəqillik qazandıqdan sonra ölkələrimiz arasında daha gözəl münasibətlər yaranmışdır. Almaniyada hesab edirlər ki, Cənubi Qafqaz ölkələri, o cümlədən Azərbaycan Avropa Birliyinə aiddirlər.
Qəbulda Almaniyanın Bakıdakı səfiri Klaus Qrevlix iştirak edirdi.
Bölmənin digər xəbərləri
