MİLLİ MƏCLİSDƏ QƏBUL
Mayın 3-də Milli Məclisin sədri Murtuz Ələsgərov ölkəmizdə işgüzar səfərdə olan Türkiyə Respublikasının ədliyyə naziri Hikmət Sami Türk başda olmaqla Türkiyə nümayəndə heyətini qəbul etmişdir.
Parlamentin sədri qonaqları salamlayaraq bildirdi ki, ölkələrimizin ədliyyə nazirliklərinin əməkdaşlığı əlaqələrimizin inkişafı üçün böyük əhəmiyyətə malikdir. Türkiyə - Azərbaycan münasibətlərinin genişlənməsində ölkələrimizin dövlət başçılarının qarşılıqlı səfərləri və görüşləri böyük rol oynamışdır.
Murtuz Ələsgərov parlamentlərarası əlaqələrin inkişafı məsələsinə toxunaraq, ölkələrimizin qanunvericilik orqanları nümayəndələrinin NATO-nun Parlament Assambleyası, AŞPA və Qara Dəniz İqtisadi Əməkdaşlıq Təşkilatının Parlament Assambleyası kimi nüfuzlu beynəlxalq təşkilatlarda uğurlu əməkdaşlığından ətraflı danışdı, Türkiyə Böyük Millət Məclisinin sədri Ömər İzginin bu ilin fevralında Bakıya səfərinin də parlamentlərarası əlaqələrin inkişafında böyük rol oynadığını bildirdi.
Parlamentin sədri Ermənistan-Azərbaycan, Dağlıq Qarabağ münaqişəsi və bu problemin sülh yolu ilə nizama salınması prosesi barədə də danışaraq bildirdi ki, əgər danışıqlar prosesi heç bir nəticə verməsə, Azərbaycan ərazilərini hərbi yolla azad etmək hüququnu özündə saxlayır.
Hikmət Sami Türk səmimi qəbula görə təşəkkür edərək dedi ki, Türkiyə Azərbaycanın dövlət müstəqilliyini ilk tanıyan ölkələrdəndir. Türkiyə rəhbərləri Dağlıq Qarabağla bağlı münaqişənin nizama salınmasında Azərbaycanın ədalətli mövqeyini tamamilə dəstəklədiklərini dəfərlərlə bəyan etmişlər. Türkiyə-Ermənistan münasibətlərinin vəziyyəti bu problemin həllindən asılıdır və Ermənistan tərəfindən işğal olunmuş Azərbaycan əraziləri azad edilməyincə onunla hər hansı bir əlaqə yaradılmasından söhbət gedə bilməz.
Hikmət Sami Türk Azərbaycanın ədliyyə naziri ilə imzaladıqları sazişin bəzi məqamlarına da toxunaraq dedi ki, bu sənəddə hüquqi yardım göstərilməsi və günahkarların təhvil verilməsi ilə yanaşı, hüququ mövzularda seminarlar və konfranslar keçirilməsi də nəzərdə tutulmuşdur.
Qəbulda qarşılıqlı maraq doğuran bir sıra məsələlər də müzakirə olundu.
Azərbaycanın ədliyyə naziri Fikrət Məmmədov, Türkiyənin Azərbaycandakı səfiri Əhməd Ünal Çeviköz qəbulda iştirak edirdilər.
Bölmənin digər xəbərləri
