MİLLİ MƏCLİSDƏ QƏBUL
Mayın 14-də Milli Məclisin sədri Murtuz Ələsgərov Avropa Şurası Nazirlər Komitəsinin AQO monitorinq qrupunun rəhbəri, İtaliyanın Avropa Şurasındakı daimi nümayəndəsi Pyetro Erkole Aqo başda olmaqla bu qrupun nümayəndə heyətini qəbul etmişdir.
Murtuz Ələsgərov qonaqları səmimiyyətlə salamlayaraq ümidvar olduğunu bildirdi ki, onların səfəri Azərbaycan ilə Avropa Şurası arasında əlaqələrin möhkəmlənməsinə kömək edəcəkdir.
Milli Məclisin sədri Avropa Şurasına daxil olarkən Azərbaycanın götürdüyü öhdəliklərin icrasının gedişi barədə məlumat verərək dedi ki, ölkə rəhbərliyi bu öhdəliklərin ardıcıl surətdə yerinə yetirilməsinə böyük diqqət verir. Parlamentin sədri həmin öhdəlikləri üc qrupa böldü. Onlardan birincisi Avropa konvensiyalarının Milli Məclisdə ratifikasiyası ilə bağlıdır. Ölkənin qanunverici orqanı İndiyədək 20-dən cox konvensiyanı ratifikasiya etmişdır. Bunların arasında insanın əsas hüquq və azadlıqlarının qorunması haqqında konvensiya, yerli özünüidarə haqqında Avropa Xartiyası, məhkum olunmuş şəxslərin verilməsi haqqında konvensiya kimi mühüm sənədlər var. Bundan əlavə, ölkəmiz Avropa Şurasının immunitet və imtiyazlar haqqında sazişinə, habelə işgəncələrə və qəddar, insanlıqdan kənar və ləyaqəti alçaldan digər davranış və cəza növləri əleyhinə konvensiyaya qoşulmuşdur.
Öhdəliklərin ikinci qrupu konstitusiya islahatlarına aiddir. Ölkəmizin Avropa Şurasına daxil olduğu vaxtdan bəri Milli Məclis Azərbaycan Respublikasında insan hüquqları müvəkkili - ombudsman haqqında konstitusiya qanununun layihəsini qəbul etmişdir. Avropa Şurasının tövsiyələrinə uyğun olaraq, ölkə parlamentində qanunvericilik orqanının səlahiyyətlərinin genişləndirilməsi və onun hökumət üzərində nəzarətinin gücləndirilməsi haqqında, vətəndaşların Konstitusiya Məhkəməsinə birbaşa müraciəti haqqında konstitusiya qanunlarının layihələri də işlənib hazırlanmışdır. Hər iki qanun layihəsi Avropa Şurasının Venesiya komissiyasında nəzərdən keçirilmişdir və yaxın vaxtlarda Milli Məclisin müzakirəsinə veriləcəkdir.
Öhdəliklərin sonuncu qrupu konkret qanun layihələrinin qəbul edilməsinə aiddir ki, onlardan da ən vacibi seçki məcəlləsinin işlənib hazırlanmasıdır. Üc qanunun - prezident, parlament və bələdiyyə seçkiləri haqqında qanunların daxil olduğu bu sənəd də Venesiya komissiyasına baxılmağa göndərilmişdir. Bundan əlavə, Milli Məclis kütləvi informasiya vasitələri haqqında qanun layihəsinin yeni redaksiyasını da qəbul etmişdir. Layihə hazırlanarkən Avropa Şurasının tövsiyələri nəzərə alınmışdır.
Alternativ hərbi xidmət haqqında, korrupsiya ilə mübarizə haqqında qanun layihələrinin işlənib hazırlanmasında da Avropa Şurası ekspertlərinin rəyləri nəzərə alınmışdır.
Murtuz Ələsgərov vurğuladı ki, ölkə parlamenti Avropa Şurası qarşısında öhdəliklərin yerinə yetirilməsi sahəsində qanun yaradıcılığı prosesini davam etdtirəcəkdir.
Monitorinq qrupunun rəhbəri Pyetro Erkole Aqo Azərbaycanın Avropa Şurasına daxil olarkən götürdüyü öhdəlikləri yerinə yetirməsindən məmnun qaldığını bildirərək dedi ki, ombudsman haqqında qanun layihəsinin qəbul olunması və vətəndaşların Konstitusiya Məhkəməsinə birbaşa müraciəti haqqında qanunvericilik aktının işlənib hazırlanması Azərbaycan vətəndaşlarının Avropa Məhkəməsinə müraciəti prosedurunu sadələşdirməyə şərait yaradır.
Sonra qonaq qeyri-hökumət təşkilatları haqqında qanun layihəsinin xüsusiyyətlərindən danışdı, bu mühüm sənədin Azərbaycanda cəmiyyətin demokratikləşdirilməsi üçün böyük əhəmiyyəti olduğunu söylədi. O, Venesiya komissiyası ekspertlərinin və Milli Məclis nümayəndələrinin əməkdaşlığını davam etdirməyin zəruriliyini də vurğuladı.
Qəbulda qarşılıqlı maraq doğuran bir sıra digər məsələlər barəsində də geniş söhbət oldu.
Bölmənin digər xəbərləri
