Bakı, 23 iyun (AZƏRTAC, Səxavət Quliyev). Xəbər verdiyimiz kimi, Milli Qurtuluş Günü münasibətilə “Harley Devidson HOG Baku”nun təşkilatçılığı, ANS-in informasiya dəstəyi ilə iyunun 7-dən 21-dək Bakı-Zaqreb-Bakı marşrutu üzrə “Azərbaycanı Avropada tanıdaq!” devizi altında motoyürüş keçirilmişdir.

AZƏRTAC xəbər verir ki, iyunun 23-də Baş nazirin müavini, Yeni Azərbaycan Partiyasının sədr müavini-icra katibi Əli Əhmədov motoyürüş iştirakçıları ilə görüşmüşdür.

Əli Əhmədov motoyürüşün əhəmiyyətini yüksək qiymətləndirmişdir. Baş nazirin müavini vurğulamışdır ki, yürüş zamanı çətinliklərə tab gətirmək ümummilli lider Heydər Əliyevin xatirəsinə dərin hörmətdən irəli gəlir. Yürüşə çıxmazdan əvvəl siz bilirdiniz ki, çətinliklərlə rastlaşacaqsınız, ancaq ümummilli lider Heydər Əliyevin xatirəsinə dərin ehtiram və Azərbaycanı Avropada daha yaxşı tanıtmaq üçün bu çətinliklərə sinə gərmək lazımdır. Biz bunu yüksək qiymətləndiririk. Bunun həm siyasi, həm də ideoloji baxımdan böyük əhəmiyyəti vardır. Həmçinin bu aksiya şəxsi fədakarlıq baxımından da yüksək qiymətə layiqdir. Bu aksiya gənclərə də bir nümunədir.

Əli Əhmədov demişdir ki, bütün dünya qurtuluş məfkurəsinin Azərbaycanda həyata keçirilməsindən sonra ölkəmizdə baş verən dəyişikliklərdən xəbərdardır. Bu yürüş zamanı siz də bunun şahidi oldunuz. Azərbaycan dünyanın uğurla inkişaf edən ölkələrindən biridir və bu inkişafın əsasında məhz Heydər Əliyevin respublikamızda yenidən hakimiyyətə gəlməsi dayanır. Bu gün Azərbaycan dünyanın ən sabit ölkəsidir. Əgər sabitlik, əmin-amanlıq olmasa, yerdə qalan bütün dəyərlər əhəmiyyət kəsb etməz. Azərbaycanda Heydər Əliyevin qayıdışı ilə bağlı yaranmış bu sərvət xalqın ən böyük sərvətidir.

ANS Şirkətlər Qrupunun prezidenti Vahid Mustafayev yürüş haqqında məlumat vermiş, aksiyanın marşrutu barədə danışmış və təəssüratlarını bölüşmüşdür. Qeyd etmişdir ki, aksiyanın məqsədi keçdiyimiz 8 ölkədə Ulu Öndərlə bağlı guşələri ziyarət etmək, Azərbaycanın bugünkü reallıqlarını və Xocalı faciəsini xarici ölkələrdəki insanlara çatdırmaq olmuşdur. Yol boyu Heydər Əliyev Fondu tərəfindən hazırlanmış müxtəlif kitablar və broşürlər yerli əhaliyə paylanmış, gənclərlə görüşlər keçirilmişdir.

Azərbaycan, Gürcüstan, Türkiyə və Serbiyada ümummilli lider Heydər Əliyevin abidələrinin ehtiramla yad olunduğunu diqqətə çatdıran Vahid Mustafayev Xorvatiyada keçirilmiş festival iştirakçılarına ölkəmizdəki inkişaf barədə məlumat verdiklərini bildirmişdir. Vurğulamışdır ki, Avropada Azərbaycana böyük sevgi vardır. Festivalda iştirak etmək üçün ən uzun məsafəni məhz Azərbaycan nümayəndələri qət etmişdilər.

Sonra Vahid Mustafayev onları lazımi materiallarla, kitablarla təmin etdiyinə görə, Heydər Əliyev Fonduna təşəkkürünü bildirmiş, festivalın köynəyini və döş nişanını Əli Əhmədova təqdim etmişdir.

Yürüş iştirakçısı İltifat Ağayev tədbirin uğurla həyata keçdiyini, yaxın illərdə ölkəmizə belə motoyürüşlərin təşkil olunmasına təşəbbüs göstərildiyini və xarici ölkələrdə Ulu Öndərin abidəsini ziyarət etməyin çox qürurverici olduğunu vurğulamışdır.

Sonda Əli Əhmədov Heydər Əliyevin xatirəsinə Yeni Azərbaycan Partiyası tərəfindən hazırlanmış kitabı motoyürüş iştirakçılarına təqdim etmişdir.