SİYASƏT
MİLLİ TƏHLÜKƏSİZLİK NAZİRLİYİ MƏTBUAT XİDMƏTİNİN M Ə L U M A T I
2001-ci il oktyabrın 8-də Rusiya vətəndaşı, 1964-cü il təvəllüdlü Qroznı şəhər sakini, milliyətcə çeçen olan İsa Sultanoviç Vaxayev Azərbaycan Respublikası Milli Təhlükəsizlik Nazirliyinə ərizə ilə müraciət edərək, ABŞ-ın ölkəmizdəki səfirliynə qarşı terror aktı planlaşdırması barədə məlumat vermişdir.
Cinayət qanunvericiliynə uyğun olaraq, İsa Vaxayev xüsusilə təhlükəli cinayətlər haqqında qəsdən yalan məlumat verilməsi ilə əlaqədar məsuliyyət barədə rəsmi xəbərdarlıq edildikdən sonra ərizəsindəki məqamlarla bağlı ondan izahat və ifadələr alınmışdır.
Ərizəçinin bildirdiynə görə, çeçən mücahidlərindən ibarət həmin cinayətkar dəstə metronun “20 Yanvar” stansiyası yaxınlığındakı mənzillərin birində keçirdiyi gizli yığıncaqlarda diplomatik nümayəndəliyə məxsus binanı partlatmaq qərarına gəlmişdir. Bu məqsədlə respublika Korlar Cəmiyyətinin inzibati binasında xeyli miqdarda partlayıcı maddə gizlədilmiş, Moskva prospektindəki tikililərdən birində isə raket qurğuları yerləşdirilmişdir. İsa Vaxayev ifadələrində gözlənilən terror aktı barədə ABŞ-ın Azərbaycandakı səfirliyini də məlumatlandırdığını göstərmişdir.
Milli Təhlükəsizlik Nazirliyinin ehtimal olunan cinayətlə əlaqədar keçirdiyi tədbirlər nəticəsində İsa Vaxayevin ərizə və ifadələrindəki hallar təsdiqini tapmamış, onun hüquq-mühafizə orqanlarına bilə-bilə yalan məlumat verməsi sübuta yetirilmişdir. İsa Vaxayev 2001-ci il oktyabrın 19-da Azərbaycan Respublikası Cinayət Məcəlləsinin 216-cı maddəsi ilə məsuliyyətə cəlb edilmişdir.
İstintaq zamanı müəyyənləşdirilmişdir ki, özünü çeçen mücahidlərinə müxalif şəxs kimi qələmə verən İsa Vaxayev Qroznıda yaşayan və guya yaraqlılar tərəfindən təqiblərə məruz qalan ailəsi ilə birlikdə ABŞ-a mühacirət etmək niyyəti ilə Bakıya gəlmiş, hüquq-mühafizə orqanlarının və səfirlik əməkdaşlarının rəğbətini qazanmaq üçün uydurma terror aksiyaları barədə məqsədli yalan məlumatlar yaymışdır.
İstintaq araşdırmaları tamamlanmış, toplanmış materiallar məhkəmə orqanlarına göndərilmişdir.
2002-ci il mayın 8-də Səbail rayon məhkəməsinin qərarı ilə İsa Vaxayev 4 il müddətinə azadlıqdan məhrum edilmişdir.