Mingəçevirdə mənzillərdən silsilə oğurluq edən şəxslər saxlanılıb
Bakı, 14 mart, AZƏRTAC
Mingəçevir şəhər sakini Ellada Kərimli ötən il dekabrın 12-də Şəhər Polis Şöbəsinə ərizə ilə müraciət edərək kürəkəninə məxsus olan və bərbərxana kimi istifadə edilən obyektdən televizorun oğurlandığı barədə məlumat verib.
Daxili İşlər Nazirliyinin mətbuat xidmətinin Şəki şəhərində regional qrupundan AZƏRTAC-a verilən məlumata görə, oğurluğu törətməkdə şübhəli bilinən şəhər sakinləri Arzuman Rəhimov və Asiman Allahverdiyev Mingəçevir Şəhər Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində saxlanaraq şöbəyə gətirilib. Dindirilmə zamanı hər iki şəxs törətdikləri cinayəti etiraf edib.
Onların ətrafında aparılan araşdırmaların davamı olaraq, həmin şəxslərin başqa cinayətlərinin də üstü açılıb. Belə ki, onların Mingəçevir şəhər sakininə məxsus mənzildən 8 min manat dəyərində məişət əşyalarını oğurladıqları müəyyən edilib. Arzuman Rəhimovun Mingəçevir şəhər sakininə məxsus yaşayış evindən 1000 manat dəyərində televizor oğurladığı da aşkarlanıb.
Ümumilikdə oğurlanan avadanlığın az bir qismi maddi sübut kimi götürülüb.
Faktla bağlı Mingəçevir Şəhər Polis Şöbəsinin istintaq bölməsində araşdırma aparılır.
Bölmənin digər xəbərləri
