Misir prezidenti göstərilən etimada görə xalqa minnətdarlığını bildirib
Qahirə, 3 aprel, AZƏRTAC
Misirdə prezident seçkilərində qalib gələn Əbdülfəttah əs-Sisi Misir xalqına ona etimad göstərdiyinə görə minnətdarlığını bildirib.
AZƏRTAC xəbər verir ki, prezident Əbdülfəttah əs-Sisi xalqa telemüraciətində seçkilərdə fəal iştirak edən misirlilərlə fəxr etdiyini və Misir xalqının yaxşı yaşaması üçün bütün var gücü ilə işləyəcəyini bildirib. İkinci müddətə seçilən dövlət başçısı ölkədə inkişafın və əmin-amanlığın təmin olunması üçün əlindən gələni edəcəyini bəyan edib.
Əbdülfəttah əs-Sisi həmçinin prezident seçkilərində rəqibi - “Əl Gad” partiyasının lideri Musa Mustafa Musaya seçkidə vətənpərvər və alicənab şəkildə iştirak etdiyinə görə təşəkkürünü bildirib.
Qeyd etmək lazımdır ki, seçkilərin nəticələri bəyan ediləndən sonra, Qahirənin və Misirin digər əyalətlərinin küçə və meydanlarında bayram şənlikləri keçirilib.
Xatırladaq ki, prezident seçkilərində seçicilərin 21 milyon 835 min 387-si (97,08 faizi) prezident Əbdülfəttah əs-Sisiyə səs verib.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
