MƏDƏNİYYƏT
Monteneqro biznes cəlbediciliyinə görə “Doing Business 2016” hesabatında 46-cı sırada yer alıb
Bakı, 24 avqust, AZƏRTAC
1992-ci ilədək keçmiş Yuqoslaviya Federativ Respublikasının tərkibində, federasiyanın dağılmasından sonra isə 2006-cı ilədək Serbiya ilə ittifaqda olan Monteneqro həmin il iyunun 3-də müstəqilliyini elan edib. Avropanın mərkəzində yerləşən və cəmi 10 ildir müstəqil siyasət yeridən bu kiçik ölkə Dünya Bankının 189 ölkədə biznes və sərmayə mühitinin əlverişliliyini qiymətləndirən "Doing Business 2016" hesabatında 46-cı sırada yer alıb. 13812 kvadratkilometr ərazisi və 650 min nəfər əhalisi olan Monteneqro hazırda Azərbaycan sərmayədarları üçün də çox əhəmiyyətli məkana çevrilib.
Monteneqronun biznes üçün əlverişli məkana çevrilməsinin səbəblərini aydınlaşdırmaq və Monteneqro-Azərbaycan əlaqələrinin son vəziyyəti haqqında məlumat almaq üçün AZƏRTAC-ın müxbiri bu ölkənin Bakıdakı fəxri konsulu Vüqar Əliyevlə söhbətləşib.
- Monteneqronun Azərbaycanın iş adamları üçün də əlverişli edən hansı özəllikləri var?
- Məlum olduğu kimi, Monteneqro bu il müstəqilliyinin 10 illiyini qeyd edir. 2006-cı ildə Serbiyadan dinc yolla - referendumla ayrılan Monteneqro bu gün Balkanlarda sabit ölkə kimi inkişaf etməkdədir. Monteneqro ticarət, iqtisadi əməkdaşlıq əlaqələri qurmaq istəyən hər kəs üçün açıq ölkədir. Buranı çox zaman fürsətlər ölkəsi də adlandırırlar. Sərmayələr üçün sabit və cəzbedici məkandır. Ölkədə aparılan özəlləşdirmə prosesini izləmək kifayətdir ki, burada biznes üçün yaradılan əlverişli mühiti görəsən. Amma hər şeydən öncə Monteneqroya gedib oranı görmək lazımdır.
Monteneqronun Azərbaycan Respublikasındaki fəxri konsulu kimi müraciət edənlərə istənilən mövzuda kömək göstərməyə və yardımçı olmağa həmişə hazırıq.
- Azərbaycan ilə Monteneqro arasında əlaqələr hansı səviyyədə inkişaf edib?
- Əvvəlcə onu qeyd edim ki, iki ölkə arasında yüksək səviyyəli siyasi münasibətlər digər sahələrdə də əməkdaşlığa mühüm zəmin yaradıb. Azərbaycan ilə Monteneqro arasında siyasi, iqtisadi, mədəni əlaqələr yüksək səviyyədədir. Artıq 4-cü ildir ki, yay mövsümündə Azərbaycandan bu ölkəyə birbaşa uçuşlar həyata keçirilməkdədir. Son 3 ildə 12 mindən artıq Azərbaycan vətəndaşı Monteneqroya turist qismində səfər edib. Paytaxt Podqoritsanın mərkəzi küçələrindən birinə Bakı adı verilib. Bu ölkədə Azərbaycanın çox gözəl imici formalaşıb. Monteneqro əhalisi bizə çox hörmətlə yanaşır. Eyni zamanda, bu ölkədə Azərbaycanın turizm potensialının ciddi təbliğatı qurulub. Bu ölkədə Azərbaycan-Monteneqro İqtisadi və Mədəni Əlaqələr Mərkəzi fəaliyyət göstərir.
- Azərbaycan vətəndaşları üçün Monteneqroya viza tələb olunurmu?
- Xeyr. Artıq neçə ildir ki, Azərbaycan vətəndaşları Monteneqroya vizasız səfər edə bilirlər. Səfər zamanı 90 gün vizasız qalma hüquqları var.
- Maraqlıdır, bu ölkə turizm üçün cəzbedici olan hansı potensial imkanlara malikdir?
- Turizm və xidmət sektorunda lider ölkə olaraq tanınan Monteneqro 650 min nəfər əhalisi olmasına baxmayaraq, turizmdə böyük ev sahibliyinə imza atır. Bura Adriatik sahilinin incisi adlanır. Ölkəni ziyarət edən turistlərin sayı 2015-də 1,6 milyondan artıq olub. Yəni, əhalisindən təxminən üç dəfə çox turist qəbul edir. Dövlət büdcəsinin yarısından çoxu turizmdən gələn gəlir hesabına formalaşır. Xüsusilə Budva, Kotor, Bar və Ulcinj yay tətillərində müxtəlif ölkələrdən gələn turistlərin ən çox sevdiyi və ziyarət etdiyi yerlərdir. Sadəcə, yay və dəniz turizmi baxımından deyil, eyni zamanda, Monteneqro Balkanlarda bənzərsiz kanyonları, milli park və alpinistik turizmi ilə öndə gələn ünvanlardan biridir. UNESCO-nun mədəni irs siyahısına daxil edilən kanyon və milli parklar Monteneqronun bənzərsiz turizm mərkəzləridir. Durmitor, Biogradska Gora, Prokletije, İşkodra Gölü, Lovcen milli parkları kimi yerlər buraya daxildir. Sveti Stefan adası və Herceg Novi də ekzotika həvəskarı olan turistlərin sevimli ekskursiya ünvanlarındandır.
Vətəndaşlarımızı Bakıdan cəmi 3,5 saatlıq uçuş məsafəsində yerləşən bu əsrarəngiz ölkəyə səfərə dəvət edirəm.