MOSKVA AZƏRBAYCAN VƏ ERMƏNİSTAN PREZİDENTLƏRİ ARASINDA BİRBAŞA DİALOQUN YENİDƏN BAŞLANMASINI ALQIŞLAYIR
Rusiya Federasiyası Xarici İşlər Nazirliyinin İnformasiya və Mətbuat Departamentinin yaydığı məlumatda deyilir ki, Moskva Azərbayrcan və Ermənistan prezidentləri Heydər Əliyev ilə Robert Koçaryan arasında birbaşa dialoqun yenidən başlanmasını alqışlayır. Avqustun 14-də onlar Naxçıvan Muxtar Respublikasının Sədərək rayonunda, iki ölkənin sərhədində görüş keçirmişlər.
RİA “Novosti” agentliyinin məlumatına görə, Moskva Dağlıq Qarabağ münaqişəsinin qarşılıqlı güzəştlər əsasında tezliklə siyasi həllinə gəlib çıxmaq üçün birinci dərəcəli əhəmiyyəti olan yüksək səviyyədə Ermənistan-Azərbaycan əlaqələrinin vacibliyini dəfələrlə vurğulamışdır.
Rusiyada ümid edirlər ki, “öz xalqlarının taleyi üçün başlıca məsuliyyət daşıyan iki ölkə prezidentlərinin şəxsi görüşləri davam etdiriləcək və hər dəfə bunların səmərəliliyi artacaqdır”. Rusiyanın fikrincə, bu, tərəflər arasında etimadı və qarşılıqlı anlaşmanı möhkəmlətməyə, regionda vəziyyətin gərginliyini aradan qaldırmağa, bütün azərbaycanlıların və ermənilərin mənafeləri naminə, Cənubi Qafqazda sülh və sabitliyin bərqərar edilməsi naminə Qarabağ düyününün açılmasını yaxınlaşdırmağa imkan verəcəkdir.
RF XİN-in məlumatında deyilir ki, Rusiyaya gəldikdə, o, münaqişənin qarşılıqlı surətdə məqbul şəkildə sülh yolu ilə həlli sahəsində göstərdikləri səylərində azərbaycanlı və erməni dostlara ayrıca və ATƏT-in Minsk qrupu çərçivəsində bundan sonra da fəal kömək edəcəkdir.
Bölmənin digər xəbərləri
