MOSKVADA AKADEMİK ARKADİ NESTEROVUN 85 İLLİK YUBİLEYİ QEYD OLUNACAQDIR
AZƏRTAC-ın xüsusi müxbiri xəbər verir ki, iyunun 20-də Moskvada Rusiyanın tanınmış oftalmoloq alimi, əməkdar elm xadimi, akademik Arkadi Nesterovun 85 illik yubileyi qeyd olunacaqdır. A.Nesterov görkəmli oftalmoloq alim, akademik Zərifə xanım Əliyevanın ən yaxın həmkarı və bəzi elmi əsərlərinin həmmüəllifi olmuşdur.
Rusiyada və dünyada klinisist-oftalmoloq və görkəmli alim kimi tanınan Arkadi Nesterov qlaukomanın diaqnostikası və müalicəsi sahəsində yeni istiqamətin banisidir. Alim 320 elmi işin, o cümlədən 14 monoqrafiyanın və kitabın (5-i xaricdə), 306 məqalənin (45-i xaricdə), habelə 42 ixtiranın müəllifidir. A.Nesterovun işləyib hazırladığı qlaukomanın patogenezi nəzəriyyəsini və bu xəstəliyin təsnifatı təkcə Rusiyada deyil, bütün dünyada geniş yayılmışdır. Onun rəhbərliyi altında 42 namizədlik və 20 doktorluq dissertasiyası müdafiə edilmişdir. A.Nesterov elmi tədqiqatlarına görə akademik M.İ.Averbax adına SSRİ Tibb Elmləri Akademiyasının mükafatı, SSRİ Dövlət mükafatı ilə təltif edilmiş, SSRİ-nin əməkdar ixtiraçısı adına layiq görülmüşdür.
Tanınmış alim ictimai həyatda da fəal iştirak edir. O, Moskva Oftalmoloqlar Assosiasiyasının prezidenti, Rusiya Prezidentinin İşlər İdarəsi Tibb Mərkəzinin məsləhətçisi, Beynəlxalq Oftalmoloqlar Konqresi yanında Beynəlxalq Qlaukoma Cəmiyyətinin böyük üzvü, “Kliniki oftalmologiya” jurnalının baş redaktorudur. “Gözün mikrocərrahiyyəsi” İnstitutunun əvəzsiz elmi rəhbəri olan Arkadi Nesterov tibbi fəaliyyətini uğurla davam etdirir.
Akademikin yetirməsi, Moskvadakı “Doktor Vizus” Oflatmologiya Klinikasının baş həkimi, ali dərəcəli həkim Tahir Cəfərli AZƏRTAC-ın xüsusi müxbirinə bildirmişdir ki, akademik Nesterovun parlaq istedadı, misilsiz insani keyfiyyətləri və saf qəlbi onun uğurunun formuludur. T.Cəfərli demişdir: “O, bizim hamımız üçün gözəl müəllim, təkcə Rusiyada deyil, həm də onun hüdudlarından kənarda nüfuzlu, bilikli, yüksək erudisiyalı alim, pedaqoq, habelə çətin məqamlarda həmişə köməyə gəlməyə hazır olan sadiq dost nümunəsidir”.
Bölmənin digər xəbərləri
