MOSKVADA MDB ÖLKƏLƏRİ HÖKUMƏT BAŞÇILARININ GÖRÜŞÜ OLMUŞDUR
Mayın 30-da Moskvada Rusiya Federasiyası hökumətinin sədri Mixail Kasyanovun sədrliyi ilə MDB Ölkələri Hökumət Başçıları Şurasının iclası olmuşdur. İclasda MDB-nin üzvü olan 12 ölkənin hökumət başçıları iştirak etmişlər. Tədbirdə baş nazir Artur Rasizadə başda olmaqla, Azərbaycan nümayəndə heyəti də iştirak etmişdir.
İclasda 12 məsələ, habelə əvvəllər qəbul edilmiş qərarların yerinə yetirilməsi gedişi müzakirə olunmuşdur.
MDB ölkələrində elektrik enerjisi obyektlərində qəza halları zamanı qarşılıqlı yardım haqqında, razılaşdırılmış aqrar siyasət konsepsiyası haqqında layihələr, MDB ölkələrinin ərazilərində birgə antiterror tədbirlərinin təşkili və həyata keçirilməsi qaydaları, gömrük xidmətlərinin inkişafına dair dövlətlərarası proqram, fundamental və təbiət elmləri sahəsində kadrlar hazırlanması, habelə QİÇS epidemiyasına qarşı təxirəsalınmaz tədbirlər haqqında və digər məsələlər əsas müzakirə obyektləri olmuşlar.
İclasda habelə bildirilmişdir ki, Birlik üzvü olan dövlətlər ticarət-iqtisadi əlaqələri dərinləşdirmək üçün lazımi tədbirlər görməli və qarşılıqlı faydalı əsasda iqtisadi inteqrasiya prosesini təkmilləşdirməlidirlər.
Asiya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
