Müasir Azərbaycanın memarı və qurucusu Heydər Əliyev həyatını doğma xalqına həsr edib
Bakı, 10 may, AZƏRTAC
Mayın 10-da Azərbaycan Milli Elmlər Akademiyasının (AMEA) Molekulyar Biologiya və Biotexnologiyalar İnstitutunda ulu öndər Heydər Əliyevin anadan olmasının 95 illiyi münasibətilə tədbir keçirilib.
İnstitutdan AZƏRTAC-a bildiriblər ki, bu elm müəssisəsinin direktoru, akademik İradə Hüseynova Ulu Öndərin Azərbaycan dövləti və xalqı qarşısında tarixi xidmətlərindən söz açıb.
İ.Hüseynova deyib: “Azərbaycan xalqı xoşbəxtdir ki, Heydər Əliyev kimi müdrik şəxsiyyət ona rəhbərlik edib. Məhz Ulu Öndərin səyi nəticəsində Azərbaycan müstəqil inkişaf, tərəqqi yolunda inamla addımlayır. 1969-cu il iyulun 14-də görkəmli dövlət xadimi Azərbaycanda ilk dəfə siyasi hakimiyyətə gəlib, beləliklə dövlətimizin həqiqi inkişafı da həmin gündən başlanıb. Ölkənin çox ağır vəziyyətdə olduğu dövrdə - 1993-cü ildə xalqın təkidli tələbi ilə yenidən hakimiyyətə gələn ulu öndər Heydər Əliyevin uzaqgörənliyi, müdrikliyi, parlaq zəkası nəticəsində ölkəmiz vətəndaş müharibəsindən, parçalanmadan, xaosdan qurtulub, respublikada siyasi sabitlik təmin edilib. Müasir Azərbaycanın memarı və qurucusu Heydər Əliyev bütün həyatını doğma xalqına həsr edib”.
Akademik İ.Hüseynova Ulu Öndərin elm xadimləri, alimlərlə görüşlərini xatırladıb, dahi rəhbərin daim elmə, təhsilə böyük diqqət və qayğı ilə yanaşdığını söyləyib.
AMEA-nın müxbir üzvü İlham Şahmuradov, professor Səftər Süleymanov və başqaları ulu öndər Heydər Əliyevin dünya tribunalarında cəsarətli çıxış və nitqlərini xatırladıb, görkəmli dövlət xadiminin xalqımızın haqq səsini duyuran unikal şəxsiyyət olduğunu qeyd ediblər.
Sonda Ümummilli Liderin həyat və fəaliyyətinə həsr olunan sənədli film göstərilib.
Bölmənin digər xəbərləri
