MÜDAFİƏ NAZİRLİYİ MƏTBUAT XİDMƏTİNİN M Ə L U M A T I
Mayin 7-də Azərbaycan Respublikasının Müdafiə Nazirliyində Türkiyə Respublikasının müdafiə naziri cənab Səbahəddin Çakmakoğlunun təntənəli qarşılanma mərasimi olmuşdur. Onun şərəfinə Azərbaycan Respublikası Silahlı Qüvvələrinin Fəxri Qarovulu düzülmüş, Türkiyə Respublikası və Azərbaycan Respublikasının dövlət himnləri səslənmişdir.
Sonra Azərbaycan Respublikasının müdafiə naziri general-polkovnik Səfər Əbiyev Türkiyə Respublikasının müdafiə naziri Səbahəddin Çakmakoğlunu qəbul etmişdir.
General-polkovnik S.Əbiyev qonağı salamlayaraq qeyd etmişdir ki, son illərdə bütün sahələrdə olduğu kimi, hərbi sahədə də Türkiyə ilə Azərbaycan arasındakı işgüzar əməkdaşlıq genişlənir. Nazir demişdir: “Azərbaycan təcavüzə məruz qaldığı ilk gündən Türkiyə ölkəmizin haqq işini birmənalı şəkildə müdafiə etmiş və ən müxtəlif beynəlxalq qurumlarda da respublikamıza dəstək vermişdir.
Ermənistanda və onun işğal altında saxladığı ərazilərdə Azərbaycan xalqının tarixi və mədəni abidələri məhv edilir. İşğal edilmiş Azərbaycan ərazilərindən terrorçu təşkilatlara və terrorizmi dəstəkləyən rejimlərə silah ötürülməsi, beynəlxalq terror təşkilatları üçün terrorçuların hazırlanması, narkotik maddələrin istehsalı və dünyanın digər bölgələrinə tranzit məntəqə kimi istifadə edilir. İndiyədək Ermənistan tərəfi həmin nəzarətsiz ərazilər vasitəsilə PKK terrorçularına külli miqdarda silah və sursat ötürmüşdür.
Biz mövcud problemin sülh yolu ilə həll edilməsinin tərəfdarıyıq, ona görə də Ermənistan Silahlı Qüvvələrinin işğal olunmuş torpaqlarımızdan qeyd-şərtsiz və dərhal çıxarılmasını tələb edirik.
Azərbaycan Respublikasının Silahlı Qüvvələri işğal olunmuş ərazilərdə yaradılmış terror mərkəzlərini məhv etməyə və torpaqlarımızı azad etməyə hazırdır”.
General-polkovnik S.Əbiyev fikrini davam etdirərək söyləmişdir ki, Azərbaycan, Türkiyə və Gürcüstan prezidentlərinin Trabzon zirvə görüşü zamanı imzalanmış sənədlər regionda qarşılıqlı birgə fəaliyyətimizin, o cümlədən hərbi sahədə əməkdaşlığımızın dərinləşdirilməsi üçün yeni şərait yaratmışdır.
O demişdir: “İndiyədək ölkələrimiz arasında bir çox sənəd, o cümlədən hərbi sahədə 30 müqavilə, saziş və protokol imzalanmışdır. Daha bir neçə mühüm sənəd yaxın müddət ərzində imzalanacaqdır. Bu sənədlər iki dövlətin hərbi əlaqələrinin xalqlarımızın mənafeyinə uyğun inkişaf etməsinə xidmət göstərir”.
Daha sonra S.Əbiyev Azərbaycan Silahlı Qüvvələrinin beynəlxalq əlaqələrinə toxunaraq qeyd etmişdir ki, hərbçilərimiz öz türk həmkarları ilə NATO-nun “Sülh naminə tərəfdaşlıq” proqramında çiyin-çiyinə iştirak edirlər. O demişdir: “Hazırda Kosovada Türkiyə Silahlı Qüvvələri sülhməramlı taburunun tərkibində Azərbaycan taqımı öz beynəlxalq missiyasını uğurla yerinə yetirir. Bu fəaliyyətimizin davamı kimi biz Əfqanıstanda həyata keçirilən sülhməramlı əməliyyatlarda iştirakımızı istisna etmirik.
Biz eyni zamanda, Əfqanıstanda həyata keçirilən antiterror əməliyyatlarına yaxın gələcəkdə Türkiyənin rəhbərlik edəcəyindən qürur hissi duyuruq”.
Səfər Əbiyev Azərbaycan-Türkiyə iqtisadi əlaqələrinə toxunaraq vurğulamışdır ki, bu ildən Bakı-Tbilisi-Ceyhan neft və bunun ardınca Bakı-Tbilisi-Ərzurum qaz kəmərlərinin inşası başlanır. Bu kəmərlər yalnız Azərbaycan və Türkiyə üçün deyil, həmçinin Asiya və Avropa dövlətləri üçün də böyük əhəmiyyət daşıyır. Dünyada və Qafqaz regionunda cərəyan edən hadisələr Azərbaycanla Türkiyə arasında hərbi sahədə daha əsaslı və səmərəli müqavilə bağlanması zəruriyyəti yaradır.
Səmimi qəbula və Azərbaycan-Türkiyə əlaqələrini yüksək qiymətləndirdiyinə görə Səbahəddin Çakmakoğlu Səfər Əbiyevə təşəkkür edərək bildirmişdir ki, biz qarşılıqlı əlaqələrimizi böyük türk millətinin iki dövləti kimi qurur və bu istiqamətdə də siyasət yürüdürük.
Sonra S.Çakmakoğlu Azərbaycan Respublikası Silahlı Qüvvələrinin təhsil sistemində yüksək nailiyyətlərin olduğunu vurğulayaraq demişdir: “Azərbaycan Silahlı Qüvvələri sülhü qorumaq üçün döyüşə biləcək qədər güclü olmalı və qalib gəlməyi bacarmalıdır. Türkiyə-Azərbaycan hərbi əməkdaşlığı bundan sonra da hərtərəfli inkişaf etdiriləcəkdir”.
S.Çakmakoğlu Türkiyə-Azərbaycan siyasi-iqtisadi-ticarət əlaqələrinə toxunaraq bildirmişdir ki, Xəzərin zəngin karbohidrogen ehtiyatlarının Bakı-Tbilisi-Ceyhan neft və Bakı-Tbilisi-Ərzurum qaz kəmərləri vasitəsi ilə Türkiyədən Qərbə ötürülməsinə Azərbaycanın dəstək verməsi Türkiyənin zənginliyini artırır.
O, PKK terroru ilə mübarizədə Azərbaycan xalqının həmişə Türkiyənin yanında olduğunu vurğulayaraq demişdir: “Bu vaxta qədər biz Azərbaycan üçün, Azərbaycan isə bizim üçün hər şey etmişdir. Bundan sonra da belə olacaqdır”.
Türkiyənin müdafiə naziri Ermənistan-Azərbaycan münaqişəsinə toxunaraq bildirmişdir ki, ermənilərin qisasçılıq hissləri bizə yaxşı məlumdur. Birinci dünya savaşında Türkiyə dövlətinə xəyanətləri nəticəsində təhlükəsiz yerə köçürülmələrini onlar bu gün “soyqırımı” kimi qələmə verirlər... Bu gün Ermənistan Azərbaycan ərazisinin beşdə birini işğal etmişdir. Biz Azərbaycan torpağının bir qarışının da Ermənistana verilməməsinin tərəfdarıyıq. Bu məsələnin həllində Azərbaycan hansı qərarı qəbul etsə, biz onu dəstəkləyəcəyik”.
Görüşdə Türkiyə Respublikasının Bakıdakı səfirinin birinci müavini cənab Gürsel Evren və Türkiyə Respublikası Silahlı Qüvvələrinin hərbi attaşesi, briqada generalı Ümid Kalender iştirak etmişlər.
Bölmənin digər xəbərləri
