“MÜDRİK HEYDƏRİN MƏMLƏKƏTİNƏ SƏYAHƏTİM”
Rusiyanın ucqar bir diyarından - Saratov vilayətindən olan jurnalist K.Çuprin bu yaxınlarda Bakıya gəlmişdi. O, şəhərimizin həyatı ilə tanış olaraq, bir çox bakılılarla, o cümlədən Dövlət Teleqraf Agentliyinin - AZƏRTAC-ın rəhbərliyi ilə görüşüb söhbət edərək, evə qayıtdıqdan sonra yerli “Oqni Balakova” qəzetində dərc olunmuş “Müdrik Heydərin məmləkətinə səyahətim” sərlövhəli məqaləsində suveren Azərbaycanın paytaxtı haqqında, ümumən ölkəmiz, onun insanları haqqında öz təəssüratlarını bölüşmüşdür.
K.Çuprin ölkəmizdə ilk növbədə onu görmüşdür ki, sözün əsl mənasında demokratik, hüquqi, dünyəvi dövlət quruculuğu yoluna qədəm qoymuş Azərbaycanda demokratiya və insan hüquqları sarıdan hər şey qaydasındadır. Jurnalistin qeydlərindən göründüyü kimi, o, Bakıda müxalifətin təşkil etdiyi mitinq hoqqabazlıqlarından birinin şahidi olmuş, özünün ahəngdar, sakit və eyni zamanda qaynar həyatını yaşayan şəhərdə sabitliyi pozmaq üçün necə gülünc cəhdlər göstərildiyini gözləri ilə görmüşdür, əmin olmuşdur ki, bakılıların böyük əksəriyyəti 90-cı illərin əvvəllərində küçə və meydanlarda özlərini göstərmiş, indi isə “həngamələrinin hökmən beynəlxalq teleefirə”, o cümlədən də Rusiya telekanallarına düşməsinə can atan qara-qışqırıqçılara qətiyyən məhəl qoymurlar.
Rusiya jurnalisti ərzaq mallarının tamamilə münasib qiymətdə olmasından danışaraq bu qənaətə gəlir ki, Bakıda özünü çox yaxşı hiss edirsən. Sahmanlı nəqliyyat xidməti - “vətəndaşları şəhərin hər hansı rayonundan ürəkləri istədikləri yerlərə daşıyan saysız-hesabsız marşrut taksilər”inin işi də onun nəzərindən qaçmamışdır. Küçələrin təmizliyi göz oxşayır, meriya həqiqətən nümunəvi qayda-qanun yarada bilmişdir...
Bakı əvvəlki kimi yenə də Avropa şəhəri olaraq qalır, hərçənd, - bu da təbiidir, - SSRİ-nin süqutundan sonra daha çox Azərbaycan şəhərinə çevrilmişdir. Müəllifin fikrincə, ölkə dövlət müstəqilliyi əldə etidikdən sonra məhz belə də olmalıdır. O ki qaldı Rusiyaya münasibətə, məqalədə deyildiyi kimi, Azərbaycan xalqının ona qarşı iddialar irəli sürməyə haqqı var. Müəllif məqalədə Rusiyanın Ermənistana 1 milyard dollarlıq müftə-müsəlləm hərbi yardım göstərməsini də xatırlayır. Öz şimal qonşusuna həmişə səmimiyyətlə və hörmətlə yanaşan Azərbaycan və ilk öncə, onun müdrik Prezidenti Heydər Əliyev isə öz xeyirxahlığını bir daha sübut etmiş, məsələn, Qəbələ radiolokasiya stansiyasından icarə ilə istifadə olunmasına razılıq vermişdir. Müəllif vurğulayır ki, Baltikyanı ölkələrdən birindəki analoji stansiya isə sadəcə, məhv edilmişdir...
Bir sözlə, özünə, öz dilinə və mədəniyyətinə münasibətin bütün incə məqamlarına həmişə daha həssas yanaşan rus jurnalistinin Azərbaycanın millətçilik hikkələrindən necə uzaq olduğunu görməsi və bunu açıq-aşkar bəyan etməsi, hər halda, xoşdur. Rus məktəbləri, ali məktəblərin rus şöbələri, Rusiyada işıq üzü görmüş kitabların mağazalarda və kitabxanalarda olması, rusdilli mətbuat, Rusiyanın bir neçə telekanalının yayımlanması, küçələrdə adamların rusca sərbəst danışması, Böyük Vətən müharibəsinə, onun, təəssüflər olsun, artıq az qalmış iştirakçılarına hörmətcil münasibət - bütün bunlar bugünkü Azərbaycanın, bugünkü Bakının reallıqlarıdır.
K.Çuprin yazır ki, əlbəttə, bu ölkənin həyatında çətinliklər də çoxdur: əzəli Azərbaycan torpaqlarının bir hissəsi hələ də işğal altındadır, bir milyon qaçqın-köçkün var, adamların gəliri yüksək deyildir, hərçənd burada vəziyyət qonşu Gürcüstan və Ermənistandakından daha yaxşıdır. Əsas sərvəti olan neftin sayəsində Azərbaycan Cənubi Qafqazda özünü dolandıran yeganə ölkədir. Lakin ölkənin rəhbərliyi dünyanın aparıcı dövlətləri ilə iqtisadi əlaqələr qurulmadan inkişafın mümkün olmadığını yaxşı başa düşür və məhz belə siyasət yeridir.
Balakovolu jurnalist məmləkətimizdə bax bunları görüb qələmə almışdır.
Bölmənin digər xəbərləri
