SİYASƏT
MÜDRİK ŞƏXSİYYƏT, MİLLƏT ATASI
Ankaradakı “Asena” nəşriyyatı Sadıq Şükürovun və Mübariz Səfərovun müstəqil Azərbaycan Respublikasının Prezidenti, zəmanəmizin görkəmli siyasi və dövlət xadimi, xalqımızın sınanmış lideri, Azərbaycan dövlətçiliyinin xilaskarı Heydər Əliyevin şərəfli ömür yolundan bəhs edən, ilk dəfə 2000-ci ildə Bakıda nəşr olunmuş “Millət atası” kitabını türk dilində nəfis şəkildə çapdan buraxmışdır.
Qardaş Türkiyədə də çox böyük hörmət və nüfuz qazanmış möhtərəm Prezidentimizin ad günü ərəfəsində bu ölkənin elmi ictimaiyyəti və bütün oxucuları üçün həqiqətən gözəl hədiyyə olan bu kitab dövlətimizin başçısının rəngli fotoşəkli ilə açılır.
Kitab ön söz, üç fəsil, nəticə və biblioqrafiyadan ibarətdir. “Dünyanın böyük siyasətçisi Heydər Əliyevin həyatından məqamlar” adlanan ilk fəslində xalqımızın müdrik oğlunun zəngin və mənalı həyatının ayrı-ayrı anlarından yığcam söhbət açılır.
Müəlliflər çox haqlı olaraq vurğulayırlar ki, Azərbaycan Prezidentinin həyatını araşdırıb öyrəndikcə, müqayisələr apardıqca bu qüdrətli şəxsiyyət insanın gözündə daha da böyüyür, ucalır, ülviləşir.
Həmin fəsildə xalqımızın ləyaqətli qızı, gözəl insan, qayğıkeş ana, istedadlı alim, akademik, Heydər Əliyevin sədaqətli ömür-gün yoldaşı mərhum Zərifə xanım Əliyeva haqqında da yığcam məlumat verilir.
Son illər tədqiqatçı alimlər, siyasətçilər Heydər Əliyev fenomeni mövzusuna daha tez-tez müraciət edirlər. “Millət atası” kitabında da bu mövzuya mühüm yer ayrılmışdır.
Kitabın ikinci fəslində Heydər Əliyevin müdrik siyasətçi kimi fəaliyyətindən ətraflı söhbət açan müəlliflər bunu onun fenomeninin çox mühüm cəhəti olaraq vurğulayırlar. Həqiqətən də, dövlət müstəqillyinin hələ on birinci ilini yaşayan Azərbaycan məhz Prezidentimizin sayəsində indi dünya birliyində sayılıb- seçilən ölkələr sırasına çıxmışdır, beynəlxalq aləmdə onun nüfuzu gündən- günə artır.
Kitabın üçüncü fəsli ədəbiyyat və mədəniyyət məsələlərinə həsr olunmuşdur. Bu da təsadüfi deyildir. Respublikamızın ədəbiyyat, mədəniyyət, elm və incəsənət xadimlərinə, bu sahələrdə çalışan, bunlarla əlaqəsi olan hər bir kəsə, ümumiyyətlə xalqımızın tam əksəriyyətinə məlumdur ki, 1970-ci illərdən bu günədək Azərbaycanın həyatının həmin sahələrinin inkişafında, ölkəmizin mədəni simasının həqiqətən dəyişməsində və indiki səviyyəyə yüksəlməsində Heydər Əliyevin xidmətləri ölçüyəgəlməzdir, bu sahələrə diqqət və qayğısı misilsizdir. Otuz ildən artıqdır ki, Heydər Əliyev respublikamızda həmin sahələrin əsl hamisi olub və bu gün də hamisidir.
Bütün bunları isə mənəviyyata əsl qayğı olmadan, millətə ürəkdən gələn bağlılıq olmadan etmək əsla mümkün deyildir. Həqiqətən də, əgər ölkənin rəhbəri həmin sahələrin inkişafı ilə yanaşı, hər bir tanınmış xadimi barədə də düşünürşə, millətin dili haqqında hətta mütəxəssislərdən daha çox narahat olursa, dahi Nizaminin məqbərəsinin, böyük ədibimiz Mirzə Cəlilin ev-muzeyinin taleyindən nigaran qalırsa, deməli, bu, onun xalqına, yurduna, torpağına olan bağlılığından, övlad məhəbbətindən gəlir. Kitabda bunu əyani surətdə təsdiqləyən kifayət qədər konkret faktlar verilmişdir.
Üçüncü fəslin sonuna “Oğuz abidəsi “Kitabi-Dədə Qorqud” sərlövhəli ayrıca bir bölmə daxil edilmişdir. Bu da tamamilə məntiqidir. Çünki xalqımızın, eləcə də bütövlükdə türk dünyasının möhtəşəm yazılı abidəsi olan bu əbədiyaşar dastanın 1300 illik yubileyinin adına layiq böyük bayram kimi, YUNESKO-nun xətti ilə beynəlxalq səviyyədə və son dərəcə təntənəli şəkildə keçirilməsinin təşəbbüsçüsü və təşkilatçısı məhz Azərbaycan Respublikasının Prezidenti Heydər Əliyev olmuşdur.
“Millət atası” kitabının müəllifləri konkret və təsirli faktlara üstünlük vermiş, xalqımızın dahi oğlunun mənalı ömür yolunun başlıca mərhələlərini göstərməyə çalışmış və məqsədlərinə nail olmuşlar.
Kitabın məsləhətçiləri İsmayıl Sadıqov və Süleyman İsmayılovdur. Əsəri türkcəyə Bəşarət İsmayıl çevirmişdir.