MÜSTƏQİL AZƏRBAYCANIN SİLAHLI QÜVVƏLƏRİNDƏ XİDMƏT ETMƏK BÖYÜK ŞƏRƏFDİR
AZƏRTAC xəbər verir ki, iyunun21-də Yeni Azərbaycan Partiyası (YAP) Gənclər Birliyi Nəsimi rayon təşkilatı Azərbaycan Respublikası Silahlı Qüvvələrinin yaradılmasının 90-cı ildönümü münasibətilə tədbir keçirmişdir.
YAP Nəsimi rayon təşkilatının qərargahında keçirilən tədbirdə partiyanın rayon təşkilatının sədri, Milli Məclisin deputatı Məlahət Həsənova çıxış edərək, Azərbaycan Silahlı Qüvvələrinin tarixindən danışmışdır. Silahlı Qüvvələrimizin bugünkü vəziyyətindən bəhs edən natiq, ümummilli liderimiz Heydər Əliyevin ordu quruculuğu sahəsində müstəsna xidmətlərini diqqətə çatdırmışdır.
M.Həsənova bildirmişdir ki, ulu öndərin titanik səyləri nəticəsində tam formalaşan ordumuz bu gün müasir hərb elminin tələblərinə cavab verən mükəmməl struktura malikdir. Azərbaycan Prezidenti, Silahlı Qüvvələrin Ali Baş Komandanı İlham Əliyevin ordu quruculuğuna göstərdiyi diqqət və qayğını yüksək qiymətləndirən natiq vurğulamışdır ki, gündən-günə güclənən, maddi-texniki bazası möhkəmlənən Azərbaycan Silahlı Qüvvələri lazım olan anda torpaqlarımızı düşmən tapdağından azad etməyə hazırdır. Əlamətdar haldır ki, bu il Azərbaycan Respublikası Silahlı Qüvvələrinin yaradılmasının 90-cı illiyinə həsr edilmiş hərbi paradı xalqımız böyük sevinc hissi və səbirsizliklə gözləyir.
Müstəqil Azərbaycanın Silahlı Qüvvələrində xidmət etməyin böyük şərəf olduğunu deyən YAP Gənclər Birliyi Nəsimi rayon təşkilatının sədri Zəfər Qurbanov və bir neçə gənc bildirmişlər ki, Azərbaycan Ordusu gündən-günə möhkəmlənir. Düşmən tapdağında qalmış torpaqlarımızın azad olunması işində gənclərin üzərinə mühüm vəzifələr düşür. Hər bir Azərbaycan oğlu öz Vətəni, milləti qarşısında müqəddəs borc sayılan hərbi xidməti yerinə yetirməlidir.
Gənclər Vətənə ləyaqətlə xidmət edəcək və torpaqlarımızın geri alınması üçün Azərbaycan Prezidenti, Silahlı Qüvvələrin Ali baş komandanı İlham Əliyevin əmrini hər an yerinə yetirməyə hazır olduqlarını söyləmişlər.
Tədbirdə Azərbaycan Prezidenti, Silahlı Qüvvələrin Ali baş komandanı İlham Əliyevə müraciət qəbul olunmuşdur.
Bölmənin digər xəbərləri
