Naxçıvan gəncləri Əlincəqalaya yürüş ediblər
Naxçıvan, 10 may, AZƏRTAC
Naxçıvan Muxtar Respublikası Ali Məclisi Sədrinin 2018-ci il 16 aprel tarixli Sərəncamı ilə təsdiq edilən “Ümummilli lider Heydər Əliyevin anadan olmasının 95 illiyinin keçirilməsinə dair Tədbirlər Planı”na uyğun olaraq muxtar respublika gənclərinin “Qurtuluşdan Əlincəqalaya” devizi altında yürüşü təşkil olunub.
AZƏRTAC-ın Naxçıvan bürosu xəbər verir ki, yürüş iştirakçıları əvvəlcə ulu öndər Heydər Əliyevin Naxçıvan şəhərinin mərkəzi meydanında əzəmətlə ucalan abidəsini ziyarət edib, önünə gül dəstələri qoyublar.
Əlincəqaladakı dövlət bayrağının önündə ümummilli lider Heydər Əliyevin həyat və fəaliyyəti haqqında danışan Naxçıvan Muxtar Respublikası Gənclər Fondunun icraçı direktoru Anar Babayev bildirib ki, müstəqil Azərbaycan dövlətinin memarı və qurucusu ümummilli lider Heydər Əliyev bəşəriyyətin yetirdiyi dahi şəxsiyyətlərdəndir. Azərbaycanda gənclər siyasətinin formalaşmasının, gənclərə dövlət səviyyəsində diqqət və qayğının göstərilməsinin əsası da ümummilli lider Heydər Əliyev tərəfindən qoyulub. Ümummilli Lider ölkəyə rəhbərlik etdiyi bütün dövrlərdə sağlam düşüncəli gənc nəslin yetişdirilməsini, gənclərin ölkənin sosial-iqtisadi, ictimai-siyasi və mədəni həyatında iştirakının təmin edilməsini diqqət mərkəzində saxlayıb. Ulu Öndərin rəhbərliyi ilə hələ ötən əsrin 70-80-ci illərində Azərbaycan gəncliyinin inkişafı istiqamətində ardıcıl tədbirlər həyata keçirilib.
Anar Babayev vurğulayıb ki, ümummilli lider Heydər Əliyev müstəqillik illərində də gənclərin ölkənin sosial-iqtisadi, ictimai-siyasi həyatında fəal iştirakının təmin olunmasını, onların sosial problemlərinin həllini diqqətdə saxlayıb, görkəmli dövlət xadiminin rəhbərliyi ilə gənclərlə iş sahəsində dövlət orqanları yaradılıb, zəruri qanunvericilik bazası formalaşdırılıb. Ulu Öndərin təşəbbüsü ilə 1996-cı il fevralın 2-də müstəqil Azərbaycan gənclərinin ilk forumu keçirilib, bir il sonra isə “2 fevral - Gənclər Günü” təsis edilib. “Biz dövlətin və cəmiyyətin idarə edilməsində gənc nəslin qüvvəsinə arxalanacaq, onların imkanlarından maksimum istifadə edəcəyik”, - deyən ümummilli lider Heydər Əliyevin gənclər siyasətinin əsas məqsədi milli dəyərlərə söykənən, Vətəninə, xalqına bağlı olan müasir düşüncəli gənc nəslin formalaşdırılması, bu gəncliyin potensialından dövlətin inkişafı naminə istifadə edilməsi olmuşdur.
“Naxçıvan Muxtar Respublikası Ali Məclisi Sədrinin diqqət və qayğısı sayəsində gənclərin sağlam, vətənpərvər ruhda formalaşmaları, yüksək səviyyədə təhsil almaları, həmçinin cəmiyyətin müxtəlif sahələrində fəal iştiraklarını təmin etmək, onların sosial problemlərinin həlli, dövlət idarəçiliyi və digər sahələrdə irəli çəkilməsi üçün ardıcıl tədbirlər görülür”, - deyən Gənclər Fondunun icraçı direktoru diqqət çatdırıb ki, gənclərlə bağlı həyata keçirilən kompleks tədbirlər nəticəsində bu gün gənclər öz intellektual səviyyələri, bilik və bacarıqları ilə seçilir, mötəbər tədbirlərdə xalqımızı layiqincə təmsil edir, beynəlxalq idman yarışlarında Azərbaycan bayrağını ən yüksək kürsülərdə dalğalandırırlar. Görülən bu işlərin nəticəsidir ki, Naxçıvan şəhəri 2018-ci il üçün ölkəmizin Gənclər Paytaxtı seçilib. Bu gün ümummilli lider Heydər Əliyevin anadan olmasının 95-ci ildönümü ilə əlaqədar gənclərin “Qurtuluşdan Əlincəqalaya” devizi altında yürüşü dərin məna kəsb edir. Ona görə ki, müstəqillik illərində Azərbaycan gənci məhv olmaq təhlükəsindən yenilməzliyə qədər inkişaf yolu keçib. Bu gün Azərbaycan gəncliyinin qazandığı bütün uğurların təməlində ümummilli lider Heydər Əliyevin ideyaları dayanır.
Sonra Ümummilli Liderə həsr olunmuş şeir bədii qiraət olunub, Naxçıvan Musiqi Kollecinin tələbələrinin ifasında mahnılar dinlənilib.
Tədbir iştirakçıları “Əlincəqala” Tarix-Mədəniyyət Muzeyində də olublar.
Sonda xatirə şəkli çəkdirilib.
Bölmənin digər xəbərləri
