Naxçıvan, 31 iyul (AZƏRTAC). Naxçıvan Muxtar Respublikası (MR) Ali Məclisi Aparatının kollektivi, Naxçıvan MR Ali Məclisinin Sədri yanında Gənclər Fondunun və Naxçıvan MR Ali Məclisinin Naxçıvanşünaslıq Mərkəzinin əməkdaşları Naxçıvan Dövlət Tarix Muzeyini ziyarət ediblər.

AZƏRTAC xəbər verir ki, ziyarətçilər muzey haqqında geniş məlumatlandırılıblar. Bildirilib ki, qədim Naxçıvan diyarında ilk muzey ötən əsrin 20-ci illərində yaradılıb. 1924-cü ilin fevral ayında Naxçıvan MR təşkil olunduqdan sonra Naxçıvan MSSR Xalq Komissarları Sovetinin 1924-cü il 30 ok­tyabr tarixli qərarı ilə indiki Naxçıvan Dövlət Tarix Muzeyinin yerində Naxçıvan Tarix-Etnoqrafiya Muzeyi təşkil olunub.

Naxçıvan Tarix-Etnoqrafiya Muzeyinin yaradılması barədə Naxçıvanın yerli hökuməti tərəfindən qərar qəbul olunmasına və Maarif Komissarlığına müvafiq tapşırıqlar verilməsinə baxmayaraq, 1924-cü ilin oktyabrından 1925-ci ilin sonunadək muzey üçün yer ayrılmamışdı. Naxçıvan MSSR Xalq Komissarları Sovetinin 1926-cı il yanvarın 6-da keçirilən iclasında “Naxçıvan Tarix-Etnoqrafiya Muzeyini zənginləşdirmək haqqında” məsələyə baxılmış və muzeyi zənginləşdirmək məqsədilə Naxçıvan şəhər sakini Balabəy Əlibəy­ovun şəxsi kolleksiyasının dövlət mülkiyyətinə götürülməsi və həmin əşyaların muzeyə təhvil verilməsi üçün komissiya yaradılıb. Beləliklə, muzeyin əməli surətdə təşkili müəyyən mənada həll edilib, B. Əlibəyovun özü isə həmin vaxtdan muzeyə direktor təyin olunub.

Bildirilib ki, yeni-yeni muzeylər yaratmaq, mövcud muzeylərin maddi-texniki bazasının möhkəmləndirilməsinə qayğı göstərmək sahəsində əsası ulu öndər Heydər Əliyev tərəfindən qoyulan ənənələr müstəqillik illərində də davam etdirilib. Son 19 ildə Naxçıvan Dövlət Tarix Muzeyi hərtərəfli dövlət qayğısı ilə əhatə olunub. Naxçıvan Muxtar Respublikası Ali Məclisi Sədrinin qayğısı ilə 2000 və 2007-ci illərdə muzeyin binasında əsaslı təmir-tikinti işləri aparılıb.

Son illər muzeyin ekspozisiyası tamamilə yenidən qurulub, eksponatların həm fiziki, həm də bioloji cəhətdən etibarlı mühafizəsi üçün ekspozisiya yeni vitrinlər və saxlanc qurğuları ilə təchiz edilib.

Yaradıldığı ilk vaxtlarda cəmi bir neçə yüz eksponatla fəaliyyətə başlayan muzeyin fond və ekspozisiyasında bu gün 49 mindən çox eksponat mühafizə edilməklə, həm də geniş şəkildə təbliğ olunur. Muzeydə eksponatların sayı 1991-ci ildə 35 min 382 ədəd olduğu halda, 2000-ci ildə bu rəqəm 38 min 631-ə çatıb. Son 15 ildə muzeyin fonduna 11 min 775 ədəd yeni eksponat daxil edilib.

Naxçıvan muxtariyyətinin yetirməsi və yaşıdı olan Naxçıvan Dövlət Tarix Muzeyi Naxçıvan Muxtar Respublikasının 90 illik yubileyi ilə əlaqədar elan olunmuş “Muxtariyyət ili”nə öz töhfəsini verməyə çalışır. Bu münasibətlə muzeyin ekspozisiyasında bu ilin fevral ayında təşkil edilən “Naxçıvan Muxtar Respublikası - 90” adlı sərgidə muxtariyyət tarixinə dair məlumatlar, tarixi xəritələr, sənədlər, fotoşəkillər, kitablar, qəzet və jurnallar, həmçinin digər materiallar nümayiş olunmaqla yanaşı, bu gün Naxçıvanda istehsal olunan sənaye məhsullarının nümunələri də tamaşaçılara təqdim edilir.