Naxçıvan, 7 avqust (AZƏRTAC, Rauf Əliyev). Naxçıvan Biznes Mərkəzində Naxçıvan Muxtar Respublikası Təhsil və İqtisadiyyat və Sənaye nazirliklərinin birgə təşkilatçılığı ilə bu il iyulun 18-də Naxçıvan Muxtar Respublikası Ali Məclisində təhsil müəssisələrində tədrisin vəziyyəti ilə bağlı keçirilmiş müşavirədə qarşıya qoyulan vəzifələrin icrasına həsr olunmuş iclas keçirildi.

AZƏRTAC xəbər verir ki, iclasda Naxçıvan Muxtar Respublikasının iqtisadiyyat və sənaye naziri Famil Seyidov və təhsil naziri Piri Nağıyev çıxış edərək görülən işlər barədə ətraflı məlumat verdilər.

Bildirildi ki, muxtar respublikanın təhsil müəssisələrində müəllim, tələbə və şagirdlərin vahid geyim formaları ilə təmin edilməsi, tədris ləvazimatlarının keyfiyyətinə və təhsil ocaqlarında yerləşən ictimai-iaşə obyektlərinin fəaliyyətinə nəzarət edilməsi sahəsində mühüm tədbirlər həyata keçirilir.

Qeyd olundu ki, ümumtəhsil məktəblərində 2025-i kişi, 4955-i qadın olmaqla, cəmi 6980 müəllim fəaliyyət göstərir. Müəllimlərin vahid geyim formasına olan illik tələbatı 10 min 471 dəst, məktəb daxilində geyilən yüngül ayaqqabıya olan illik tələbatı isə 7 min 25 cüt təşkil edir. Ümumtəhsil məktəblərində 21 min 441-i oğlan, 22 min 676-sı qız olmaqla, cəmi 44 min 117 şagird təhsil alır. Onların vahid geyim formasına olan illik tələbatı 66 min 176 dəst, məktəb daxilində geyilən yüngül ayaqqabıya olan illik tələbatı isə 44 min 200 cüt təşkil edir. Müəllim və şagirdlər üçün geyim formalarının istehsalını “Zümrüd” kiçik müəssisəsi həyata keçirir.

İclasda muxtar respublikanın lisey, kollec və peşə məktəblərində isə 86-sı kişi, 233-ü qadın olmaqla, 319 müəllimin fəaliyyət göstərdiyi diqqətə çatdırıldı. Bildirildi ki, adıçəkilən təhsil müəssisələrində 2080 şagird, müdavim və tələbə təhsil alır. Bu müəssisələrin geyim formalarının tikilişini “Naxçıvan Tikiş”, “Naxçıvan Alt Trikotaj” Açıq Səhmdar cəmiyyətləri (ASC) və “Zümrüd” kiçik müəssisəsi həyata keçirir. Ali məktəblərdə çalışan 285-i kişi, 259-u qadın olmaqla, 544 müəllimin və sayı 4921 nəfər təşkil edən ali məktəb tələbələrinin vahid geyim formasının tikilişi isə “Naxçıvan Tikiş” və “Naxçıvan Alt Trikotaj” ASC-lər tərəfindən aparılır.

Vurğulandı ki, ümumilikdə, Naxçıvan Muxtar Respublikasında bütün müəllim, şagird və tələbələrin vahid geyim formasına olan illik tələbatı 88 min 444 dəst, məktəb daxilində geyilən yüngül ayaqqabıya olan illik tələbatı isə 53 min 624 cüt təşkil edir. Hazırda muxtar respublikada illik istehsal gücü 156 min dəst olan “Naxçıvan Tikiş”, illik istehsal gücü 156 min dəst olan “Naxçıvan Alt Trikotaj” ASC-lər və illik istehsal gücü 397 min dəst olan “Zümrüd” kiçik müəssisəsinin fəaliyyəti bütün təhsil müəssisələrində vahid geyim formalarına olan tələbatı tamamilə yerli istehsal hesabına ödəməyə imkan verir. Bu il “Zümrüd” kiçik müəssisəsində illik istehsal gücü 312 min ədəd olan köynək istehsalı sahəsi də qurulub. Bu da gələcəkdə köynəyə olan tələbatı tam təmin edəcək. Yeni tədris ilinə hazırlıqla əlaqədar hazırda həmin müəssisələrin anbarlarında 13 min 500 dəst vahid geyim forması ehtiyatı mövcuddur. Təhsil müəssisələrindən daxil olan sifarişlər nəzərə alınmaqla vahid geyim formalarının tikilişi davam etdirilir.

Bildirildi ki, Naxçıvan Muxtar Respublikası İqtisadiyyat və Sənaye Nazirliyi tərəfindən muxtar respublikada tikilən vahid geyim formalarının keyfiyyətinə nəzarət daim diqqətdə saxlanılır, tikiş mallarının satışını həyata keçirən ticarət obyektlərində mütəmadi olaraq monitorinqlər keçirilir. Bundan əlavə, müntəzəm olaraq təhsil ocaqlarında yerləşən ictimai-iaşə obyektlərində müəyyənləşdirilmiş qaydaların tələblərinə əməl olunması, yerli istehsal məhsullarının satışına üstünlük verilməsi diqqətdə saxlanılır, satışda olan malların keyfiyyətinə nəzarət olunur. Təhsil müəssisələrində fəaliyyət göstərən iaşə obyektlərini ərzaq məhsulları ilə təchiz edən müəssisələrdə istehsal olunan məhsullar “İstehlak Mallarının Ekspertizası Mərkəzi” Məhdud Məsuliyyətli Cəmiyyəti tərəfindən laboratoriya təhlillərindən keçirilir.

Tədbirdə Naxçıvan Muxtar Respublikası İqtisadiyyat və Sənaye Nazirliyinin şöbə müdiri Namiq Əhmədovun, Naxçıvan Muxtar Respublikası Standartlaşdırma, Metrologiya və Patent üzrə Dövlət Komitəsinin şöbə müdiri Rauf Rüstəmovun çıxışları dinlənildi.

Sonda qeyd olunan məsələlər ətrafında müzakirələr aparıldı, tədbir iştirakçılarını maraqlandıran suallar cavablandırıldı.