CƏMİYYƏT
Naxçıvan səhiyyəsi intensiv inkişaf yolundadır
Ölkənin ixtisaslaşmış tibb müəssisələri ilə sıx əməkdaşlıq mürəkkəb cərrahiyyə əməliyyatlarının muxtar respublika daxilində həyata keçirilməsinə şərait yaradır
![Naxçıvan səhiyyəsi intensiv inkişaf yolundadırÖlkənin ixtisaslaşmış tibb müəssisələri ilə sıx əməkdaşlıq mürəkkəb cərrahiyyə əməliyyatlarının muxtar respublika daxilində həyata keçirilməsinə şərait yaradır](/files/2014/2/1200x630/14071455943181811305_1200x630.jpg)
Naxçıvan, 29 may (AZƏRTAC). Naxçıvan Muxtar Respublikası Ali Məclisi və Azərbaycan Respublikası Səhiyyə Nazirliyinin birgə razılaşdırılmış Tədbirlər Planına uyğun olaraq, muxtar respublikanın 90 illiyi münasibətilə silsilə tədbirlər davam etdirilir. Yubiley çərçivəsində bir sıra işlər görülmüş, humanitar aksiyalar təşkil olunmuşdur.
Naxçıvan MR Səhiyyə Nazirliyinin mətbuat xidmətindən AZƏRTAC-a bildirilmişdir ki, muxtar respublikada səhiyyə xidmətlərinin genişləndirilməsi və keyfiyyətinin yüksəldilməsi, tibb müəssisələrinin dərman preparatları və avadanlıq təminatının daha da yaxşılaşdırılması, profilaktik tədbirlərin əhatəliliyinin əhəmiyyətli dərəcədə artırılması, yeni səhiyyə müəssisələrinin inşası istiqamətində müntəzəm iş aparılır.
Paytaxt Bakı şəhərində fəaliyyət göstərən kardiocərrahiyyə uroloji, plastik cərrahiyyə, göz xəstəlikləri, angioqrafiya və digər ixtisaslar üzrə həkim briqadalarının vaxtaşırı muxtar respublikaya dəvət olunması, aztəminatlı ailələr üçün nəzərdə tutulmuş xüsusi sağlamlıq layihələrinin intensiv qaydada icra olunması əhali tərəfindən rəğbətlə qarşılanır. Azərbaycan Səhiyyə Nazirliyinin yüksək ixtisaslı həkim briqadalarının “Muxtariyyət ili”ndə də qədim diyara gəlməsi aztəminatlı ailələrdən olan xəstələrin müayinə və müalicə işinin daha da yaxşılaşmasına, mürəkkəb cərrahiyyə əməliyyatlarının muxtar respublika daxilində təşkilinə şərait yaradır və nəticə etibarilə Naxçıvan səhiyyəsinin intensiv inkişafına yol açır.
Bu il nazirliyin Mərkəzi Neftçilər Xəstəxanası Kardiocərrahiyyə Mərkəzinin həkim briqadası artıq iki dəfə Naxçıvanda olmuş, Diaqnostika-Müalicə Mərkəzində 26 açıq ürək, periferik damar əməliyyatları aparmışlar. Mərkəzi Neftçilər Xəstəxanasının invaziv kardioloqları da xəstələr üzərində angioqrafiya əməliyyatı həyata keçirmiş, stend qoymuşlar. Bütövlükdə, son illər ərzində Naxçıvan Diaqnostika-Müalicə Mərkəzində yüzlərlə xəstə üzərində angioqrafiya əməliyyatı aparılmış, daralmış ürək damarları balonla genişləndirilmiş, stendlər, kardiostimulyatorlar qoyulmuş, müxtəlif anadangəlmə və qazanılmış ürək qüsurları aradan qaldırılmışdır.
Akademik Zərifə Əliyeva adına Milli Oftalmologiya Mərkəzinin 7 nəfərlik həkim briqadası tərəfindən Naxçıvan Diaqnostika-Müalicə Mərkəzində və Göz Xəstəxanasında 39 cərrahiyyə əməliyyatı, 58 müayinə aparılmışdır. Naxçıvan Muxtar Respublikasının 90 illik yubileyi çərçivəsində Əziz Əliyev adına Azərbaycan Dövlət Həkimləri Təkmilləşdirmə İnstitutunun rektoru Nazim Qasımovun rəhbərlik etdiyi 13 nəfərlik heyət də ötən ay muxtar respublikaya ezam olunmuş, həkimlər ixtisaslarına uyğun müvafiq xəstəxanalarda fəaliyyət göstərmişlər. Bu səfərdə əsas məqsəd yerli həkimləri tibb elminin aktual problemləri barədə məlumatlandırmaq, onların yeni müayinə və müalicə üsulları barədə biliklərini təkmilləşdirməkdən ibarət olmuşdur. İnstitutun yüksək ixtisaslı həkimləri Naxçıvan Diaqnostika-Müalicə Mərkəzində cərrahiyyə, Əziz Əliyev adına Naxçıvan Muxtar Respublikası Mərkəzi Uşaq Xəstəxanasında pediatriya, Akademik Zərifə Əliyeva adına Naxçıvan Şəhər Poliklinikasında terapiya, Doğum Mərkəzində ginekologiya, Psixi Xəstəliklər Dispanserində nevrologiya və psixiatriya, Kardioloji Mərkəzdə isə kardiologiyanın aktual problemlərinə dair mühazirələr oxumuş, dinləyiciləri maraqlandıran sualları cavablandırmışlar. Həkim briqadasına daxil olan bir qrup mütəxəssisin iştirakı ilə Naxçıvan Muxtar Respublikası Doğum Mərkəzində mürəkkəb cərrahiyyə əməliyyatı da həyata keçirilmişdir.
Akademik M.Ə.Mirqasımov adına Respublika Klinik Xəstəxanasının baş həkimi Telman İbadovun rəhbərlik etdiyi yüksək ixtisaslı həkim heyəti isə aprel ayının 23-dən etibarən Ordubad rayonunda növbəti humanitar aksiya keçirmişdir. Naxçıvan Muxtar Respublikasının yaradılmasının 90 illik yubileyi münasibətilə Ordubad Rayon Mərkəzi Xəstəxanasında təşkil olunan üçgünlük aksiya çərçivəsində 2361 pasiyent profilaktik tibbi müayinədən keçirilmiş, cərrahi müdaxiləyə ehtiyacı olan 64 nəfər üzərində əməliyyat aparılmışdır.
Silsilə tədbirlərin davamı olaraq, M.A.Topçubaşov adına Elmi-Cərrahiyyə Mərkəzinin nəzdindəki Uşaq Ürək Cərrahiyyə Mərkəzinin 14 nəfərdən ibarət tibbi heyəti bu günlərdə Naxçıvana gəlmişdir. Tibb üzrə fəlsəfə doktoru Elnur Həsənovun rəhbərlik etdiyi heyətin tərkibində 3 cərrah, 2 uşaq kardioloqu, 2 anestezioloq-reanimatoloq, 1 perfüzioloq-həkim, 6 tibb bacısı vardır.
Mərkəzin invaziv kardioloqu Elnur İmanov isə ehtiyac olduqca Naxçıvana gələrək əvvəlcədən qeydiyyata alınmış, əməliyyata ehtiyacı olan uşaqların müayinə və müalicəsində iştirak edir. Ötən həftə E.İmanov anadangəlmə ürək qüsuru olan 40 uşağın müayinəsini aparmış, 4 uşaqda qapalı, 14 uşaqda açıq ürək əməliyyatının aparılması qərara alınmışdır. Artıq 3 xəstə üzərində açıq ürək əməliyyatları uğurla başa çatdırılmışdır. Digər 10 xəstə isə yaxın günlərdə əməliyyat olunacaqdır.
Naxçıvan MR Səhiyyə Nazirliyinin mətbuat xidmətindən o da bildirilmişdir ki, Uşaq Ürək Cərrahiyyə Mərkəzi ilə qarşılıqlı əlaqələr muxtar respublikada uşaq invaziv kardiologiyasının inkişafında əhəmiyyətli rol oynayır. Naxçıvanda uşaqlar üzərində açıq ürək əməliyyatlarının təşkili bu əməkdaşlığın ən böyük uğurlarından biridir.
Azərbaycan Səhiyyə Nazirliyinin dəstəyi ilə Naxçıvanda elmi-praktik konfrans və seminarların keçirilməsi də artıq ənənə halını almışdır. Naxçıvan Muxtar Respublikasının 90 illik yubileyi ilə əlaqədar Bakı şəhərində fəaliyyət göstərən “İmplandent” klinikasının tibb heyətinin iştirakı ilə mayın 28-də “Stomatologiyanın aktual problemləri” mövzusunda elmi-praktik konfrans keçirilmişdir. İyunun əvvəllərində isə Azərbaycan Endokrinoloji Mərkəzinin iştirakı ilə “Diabetik neyropatiya və diabetik nefropatiya” mövzusunda növbəti elmi-praktik konfransın keçirilməsi, muxtar respublikanın rayonlarında endokrinoloji xəstələrin müayinəsi nəzərdə tutulur.
Rauf Əliyev
AZƏRTAC-ın Naxçıvan Muxtar Respublikasındakı bürosunun rəhbəri