Naxçıvanda “Fövqəladə Hallara Hazırlıq Düşərgəsi”nə start verilib
Bakı, 7 aprel, AZƏRTAC
Naxçıvan Muxtar Respublikasının Fövqəladə Hallar Nazirliyi və Gənclər Fondunun birgə təşkilatçılığı ilə Ümummilli Lider Heydər Əliyevin 100 illik yubileyinə həsr olunmuş “Fövqəladə hallara hazırlıq düşərgəsi”nə start verilib.
Bu barədə AZƏRTAC-a Naxçıvan Gənclər Fondundan məlumat verilib.
Aprelin 6-dan 8-dək Babək rayonu ərazisindəki Şıxmahmud meşəsində reallaşacaq düşərgədə məşğələ saatları, təlim və seminarlar, yarışlar, panel müzakirə, özfəaliyyət saatı, infosessiya fəaliyyətləri təşkil olunacaq.
Qırx gəncin iştirak haqqı qazandığı layihənin iştirakçıları əvvəlcə çadırlara yerləşdirilib, təlimatlandırılıb, beş komandaya bölünüb və zəruri vasitələrlə təmin olunub.
İştirakçılar Ulu Öndər Heydər Əliyevin Naxçıvan şəhərinin mərkəzində ucalan abidəsi önünə gül dəstələri qoyub, dahi şəxsiyyətin xatirəsinə ehtiramlarını bildiriblər. Sonra görkəmli dövlət xadiminin həyatı, çoxşaxəli fəaliyyətini minə yaxın maddi mədəniyyət nümunələri ilə özündə əks etdirən muzeyə baxış olub.
Daha sonra iştirakçılar Gənclər Mərkəzindən düşərgəyə yola düşüblər. Düşərgənin rəsmi açılış tədbiri həyata keçirilib.
Tədbirdə əvvəlcə Ulu Öndərin və şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
Rəsmi açılış tədbirini Naxçıvan Muxtar Respublikası fövqəladə hallar naziri, polkovnik Şahin Mirzəyev açıb. Diqqətə çatdırıb ki, yetişməkdə olan gənc nəslin dövlətçilik əqidəsində tərbiyəsi, onlara vətənpərvərlik məfkurəsinin aşılanması, sağlam və dözümlü bədənə sahib olması qarşıya qoyulan əsas məqsəd kimi diqqəti cəlb edir. Bu gün gənclərimizin iştirak etdiyi bu tədbir də inanırıq ki, onların düşüncə tərzində, fəaliyyətlərində müstəsna rol oynayacaq. Həmçinin bu sahədə öz bacarıqlarını sınamaq istəyən gənc könüllülərimiz də üç gün müddətində fövqəladə halların bütün praktik biliklərini mənimsəyəcək, bu sahədə geniş dünyagörüşü qazanacaq.
Tədbirdə çıxış edən Milli Məclisin deputatı, Gənclər Fondunun icraçı direktoru Cəbi Quliyev qeyd edib ki, layihə gənclərin fövqəladə hallar, onlardan qorunma yolları barədə məlumatlılığının artırılması, onların bu sahədəki nəzəri və praktik biliklərinin yüksəldilməsi, eləcə də fövqəladə hallarla bağlı məsələlərin müzakirəsində və qarşısının alınması istiqamətində həll yollarının müəyyən edilməsində gənclərin fəal iştirakını təmin etmək məqsədilə keçirilir.
Sonra tədbir iştirakçıları ağac əkiblər.
Bölmənin digər xəbərləri
