NAXÇIVANIN HÜQUQ İNSTİTUTLARI İNKİŞAFDADIR
Ədliyyə nazirliyinin mətbuat xidmətindən AZƏRTAC-a bildirmişlər ki, dövlətimizin başçısı cənab İlham Əliyevin ədliyyə orqanlarının inkişaf etdirilməsi haqqında 2006-cı il 17 avqust tarixli Fərmanına əsasən ədliyyə fəaliyyətinin təkmilləşdirilməsi, o cümlədən penitensiar xidmətin işinin köklü surətdə yaxşılaşdırılması üzrə məqsədyönlü tədbirlər görülür, məhkumların hüquqlarına riayət olunması və saxlanma şəraitinin beynəlxalq standartlara uyğunlaşdırılması, onların öz ailələrinə yaxın ərazilərdə cəza çəkməsi və gələcək sosial adaptasiyası məqsədi ilə regionlarda yeni cəzaçəkmə müəssisələri inşa olunur.
Bu günlərdə Naxçıvan MR Ədliyyə Nazirliyi Penitensiar Xidmətinin yeni tikilmiş qarışıq rejimli cəzaçəkmə müəssisəsi istifadəyə verilmişdir. Tədbirdə Naxçıvan MR Ali Məclisinin sədri Vasif Talıbov, Azərbaycan Respublikasının ədliyyə naziri, Məhkəmə-Hüquq Şurasının sədri Fikrət Məmmədov iştirak etmişlər.
Eyni zamanda, Fikrət Məmmədov Naxçıvan MR Ədliyyə Nazirliyinin əməkdaşları ilə və hakimlərlə görüşmüşdür. Görüşdə Azərbaycan xalqının ümummilli lideri Heydər Əliyevin Naxçıvan MR-in problemlərinə daim diqqət yetirdiyi, 2002-ci il 24 avqust tarixli Fərmanına əsasən Naxçıvan Ədliyyə Nazirliyinin səlahiyyətlərinin genişləndirilməsi və inkişafı üçün tədbirlərin müəyyən olunaraq həyata keçirilməsi vurğulanmışdır. Naxçıvan MR hüquq institutlarının inkişafı ilə bağlı ölkəmizin Prezidenti İlham Əliyevin 2006-cı il 2 noyabr tarixli Fərmanının icrası üzrə görülmüş tədbirlər qeyd edilmiş, qarşıda duran vəzifələrdən danışılmış, mövcud problemlərlə maraqlanılaraq, müvafiq tapşırıqlar verilmişdir. Yeni müəssisəyə və Məhkəmə Ekspertizası Mərkəzinin Naxçıvan filialına müvafiq texniki yardım göstərilmiş, o cümlədən ən müasir tipli kriminalistik avadanlıq və təşkilati texnika təqdim edilmişdir.
Həmçinin nazir təmir və tikinti işlərindən sonra istifadəyə verilmiş Naxçıvan MR Ali Məhkəməsinin və yeni tikilmiş Kəngərli Rayon Məhkəməsinin binalarına baş çəkərək, yaradılmış iş şəraiti ilə tanış olmuşdur. F.Məmmədov eyni zamanda Naxçıvan MR Hərbi və Ağır cinayətlərə dair işlər üzrə məhkəmələri üçün inşa edilən binalarda tikinti işlərinin gedişi ilə maraqlanmış, müvafiq tövsiyələrini vermişdir.
Bölmənin digər xəbərləri
