SİYASƏT
NAZİRLƏR KABİNETİNİN MƏTBUAT MƏRKƏZİNİN MƏLUMATI
Aprelin 23-də baş nazir Artur Rasizadə Yunanıstanın inkişaf məsələləri naziri Akis Tsokxadzopulosun başçılıq etdiyi nümayəndə heyətini qəbul etmişdir.
Baş nazir Artur Rasizadə qonağı salamlayaraq, respublikamızın Yunanıstanla qarşılıqlı münasibətlərinin yaxşılaşmasına və əlaqələrinin genişləndirilməsinə böyük əhəmiyyət verdiyini, bu səfərin ölkələrimiz arasında əməkdaşlığın bir çox sahələrdə inkişafı üçün faydalı olacağını bildirdi.
Qəbula görə Azərbaycanın baş nazirinə təşəkkürünü bildirən Akis Tsoxadzopulos səfərinin tanışlıq məqsədi daşıdığını söylədi, Bakıda keçirdiyi görüşlər barədə ətraflı məlumat verdi. O, Azərbaycanla Yunanıstan arasındakı ikitərəfli əməkdaşlıq məsələlərinə toxunaraq, Azərbaycanla iqtisadi və mədəni əlaqələrin genişləndirilməsinə ölkəsinin böyük əhəmiyyət verdiyini, energetika, sənaye, ticarət və turizm sahələrində əməkdaşlığın intensiv inkişafına əmin olduğunu vurğuladı.
Dağlıq Qarabağ məsələsinə toxunan qonaq, Yunanıstanın münaqişənin tezliklə beynəlxalq hüquq normalarına uyğun olaraq, sərhədlərin toxunulmazlığı və ərazi bütövlüyü prinsipləri əsasında həllinə tərəfdar olduğunu nəzərə çarpdırdı.
Söhbət zamanı qarşılıqlı maraq doğuran digər məsələlər ətrafında da fikir mübadiləsi aparıldı.
Görüşdə Yunanıstanın Bakıdakı səfiri Merkurios Karafotias iştirak edirdi.
Bölmənin digər xəbərləri
