Nepalda təyyarə qəzası: həlak olanların sayı 49 nəfərə çatıb
Bakı, 12 mart, AZƏRTAC
Dəkkədən Nepalın paytaxtı Katmandu şəhərinə uçan sərnişin təyyarəsinin qəzaya uğraması nəticəsində azı 49 nəfər həlak olub, 22 nəfər isə yaralanıb.
AZƏRTAC Interfax informasiya agentliyinə istinadla xəbər verir ki, “US-Bangla” aviadaşıyıcısının nümayəndəsi Kampul İslamın məlumatına əsasən, qəza zamanı təyyarədə olan sərnişinlərin 40-ı Banqladeş, 25-i Nepal, 1-i Çin, 1-i isə Maldiv vətəndaşıdır.
Xatırladaq ki, Dəkkə - Katmandu reysini həyata keçirən “Bombardier Q400” təyyarəsi eniş zamanı Tribxuvan beynəlxalq aeroportunun yaxınlığındakı futbol meydançasına düşərək yanıb. Hadisə zamanı təyyarənin göyərtəsində 71 nəfərin, o cümlədən 4 ekipaj üzvünün olduğu bildirilir. Hazırda qəza yerində xilasedicilər və yanğınsöndürənlər işləyir.
Hava limanı işini dayandırıb, bütün reyslər ləğv olunub. Aeroport administrasiyası qəzaya təyyarədə yaranan texniki nasazlıqların səbəb olduğunu ehtimal edir.
Bölmənin digər xəbərləri
