NEVADA-DEL-UİLA VULKANININ PÜSKÜRMƏSİ İLƏ ƏLAQƏDAR KOLUMBİYADA FÖVQƏLADƏ VƏZİYYƏT ELAN EDİLMİŞDİR
AZƏRTAC xəbər verir ki, Kolumbiya hökuməti Nevada-del-Uila vulkanının püskürməsi ilə əlaqədar aprelin 15-də onun ətrafındakı zonada fövqəladə vəziyyət elan etmişdir.
Kolumbiya Geologiya İnstitutundan bildirmişlər ki, püskürməyə yeraltı təkanlar səbəb olmuşdur. Paytaxt Boqotadan 240 kilometr cənub-şərqdə yerləşən Kauka departamentində kəndlərin əhalisinin köçürülməsinə başlanmışdır. Təhlükənin artacağı təqdirdə, bu zonada yaşayan 100 min əhalinin hamısı köçürülməlidir.
Nevada-del-Uila dəniz səviyyəsindən 5,6 min metr yüksəklikdə yerləşir. Əvvəllər yatmış sayılan bu vulkan son 4 ayda dəfələrlə “oyanaraq”, 13 kilometr məsafəyədək kül püskürmüşdür.
Bölmənin digər xəbərləri
