Nizami Gəncəvi adına Azərbaycan Ədəbiyyatı Muzeyi Tbilisidəki Azərbaycan mədəniyyət ocaqları ilə əməkdaşlıqda maraqlıdır
Tbilisi, 30 sentyabr, AZƏRTAC
Nizami Gəncəvi adına Milli Azərbaycan Ədəbiyyatı Muzeyinin direktoru, Milli Məclisin deputatı, akademik Rafael Hüseynov Gürcüstana səfər çərçivəsində Tbilisidəki M.F.Axundzadə adına Azərbaycan Mədəniyyəti Muzeyində olub.
AZƏRTAC xəbər verir ki, Axundzadə adına muzeyin direktoru, Azərbaycanın Əməkdar mədəniyyət işçisi Leyla Əliyeva muzeyin fəaliyyət istiqamətləri barədə akademikə geniş məlumat verib.
Hər iki muzeyin rəhbərləri arasında Azərbaycan ədəbiyyatının, adət-ənənələrinin, milli mədəniyyətinin xarici ölkələrdə təbliği, həmçinin mədəni əlaqələrin inkişafı istiqamətində əməkdaşlıq barədə razılıq əldə olunub.
R.Hüseynov jurnalistlərə müsahibəsində deyib: “Bu gün Gürcüstanda Azərbaycana aid bir sıra mədəniyyət ocaqları var. Azərbaycan mədəniyyətinin, ədəbiyyatının, incəsənətinin, mətbuatının bir çox tanımış simaları məhz Tbilisidə yaşayıb, yazıb, yaradıblar. Bu gün də Tbilisidə onların adlarını daşıyan xatirə muzeyləri, abidə və digər mədəniyyət ocaqları var. Təəssüf ki, onların bəziləri baxımsızlıq üzündən istifadəyə yararsız hala düşüb”.
Tbilisidə M.F.Axundzadə adına Azərbaycan Mədəniyyəti Muzeyinin və Nəriman Nərimanovun Xatirə Muzeyinin fəaliyyət göstərməsini yüksək qiymətləndirən R.Hüseynov bildirib ki, bu muzeylərin də maddi-texniki bazasının gücləndirilməsinə böyük ehtiyac var: “Nizami Muzeyi Axundzadə adına muzeyə xeyli sayda kitab, jurnal və digər yazılı ədəbiyyat və mədəniyyət nümunələri göndərəcək. Biz bu yolla həm əməkdaşlığımızı, həm bu muzeylərin maddi-texniki bazasını, eləcə də təbliğat imkanlarımızı genişləndirmiş olacağıq”.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
