Nizami rayonunda fiziki qüsurlu uşaqlar üçün bayram şənliyi təşkil olunmuşdur
Bakı, 24 dekabr (AZƏRTAC). 31 dekabr-Dünya Azərbaycanlılarının Həmrəyliyi və Yeni İl bayramı münasibətilə Yeni Azərbaycan Partiyası (YAP) Nizami rayon təşkilatının gənclər birliyi fiziki qüsurlu uşaqlara təmənnasız yardım göstərən bağça tipli “Qayğı” reabilitasiya mərkəzində bayram şənliyi təşkil etmişdir.
Gənclər birliyindən AZƏRTAC-a bildirmişlər ki, şənlikdə birliyin idarə heyətinin üzvü Sevinc Abdullayeva balacaları əlamətdar bayramlar münasibətilə təbrik etmişdir. Bildirmişdir ki, Azərbaycan dövləti cəmiyyətimizin sabahı olan uşaqlarımızın xoşbəxt böyümələri üçün hər cür şərait yaradır. Xüsusilə kimsəsiz və xüsusi qayğıya ehtiyacı olan uşaqlara diqqət və qayğı dövlətimizin sosial siyasətində aparıcı yerlərdən birini tutur.
Mərasimdə Nizami rayon uşaq və yeniyetmələrin yaradıcılıq mərkəzinin kollektivinin rəqs nümunələri nümayiş etdirilmişdir. Balacalar üçün ən xoş təsir bağışlayan hissə isə Şaxta baba ilə Qar qızın təbrikləri və rəqsləri olmuşdur.
Sonda uşaqlara hədiyyələr verilmişdir.
Bölmənin digər xəbərləri
