Bakı, 15 noyabr, AZƏRTAC

Nyu-Dehli hakimiyyəti Hindistanın paytaxt regionunda havanın təhlükəli dərəcədə çirklənməsi səbəbindən avtomobil nəqliyyatından istifadəyə qadağa qoymaq və bir sıra sənaye müəssisəsinin fəaliyyətini dayandırmaq imkanlarını nəzərdən keçirir.

AZƏRTAC ANI agentliyinə istinadla xəbər verir ki, bu barədə Dehli hökumətinin ətraf mühitin mühafizəsi naziri Qopal Ray bildirib.

“Ali Məhkəməyə paytaxt ərazisində (Nyu-Dehlidən başqa Noyda, Fəridabad, Qaziabad, Quruqram şəhərləri də daxil olmaqla) karantinin tətbiqinə hazır olduğumuzu dedik. Havanın çirklənməsi ilə mübarizədə birgə fəaliyyətə ehtiyacımız var və biz bunu ştat və mərkəzi hakimiyyət orqanları ilə birgə etməliyik”, - Qopal Ray belə deyib.

Həmçinin Nyu-Dehlidə ofis mərkəzlərinin bağlanması və əməkdaşların distant iş rejiminə keçirilməsi də istisna edilmir. Bir müddət öncə Hindistanın paytaxtında məktəblərin fəaliyyəti dayandırılıb və tikinti işləri qadağan olunub.

Dehlidə sutkalıq hava keyfiyyəti indeksi noyabrın 5-dən bəri 300-dən aşağı düşməyib. Hava keyfiyyəti indeksi 0-dan 50-yə qədər olduqda yaxşı, 51-dən 100-ə qədər olduqda qənaətbəxş, 151-dən 200-ə qədər olduqda orta, 201-dən 300-dək olduqda yüksək çirklənmiş, 300-dən çox olduqda isə təhlükəli hesab edilir. Hazırda şəhərin tibb müəssisələrinə müraciətlərin sayı kəskin artıb. Sakinlər əsasən təngnəfəslikdən və göz qaşınmasından şikayətlənirlər.

Hindistanda məhsul yığımından sonra tarlalarda bitki qalıqlarının yandırılması havanın çirklənməsinin əsas səbəblərindən biri hesab olunur. Dehli yaxınlığında yerləşən Pəncab və Haryana əyalətləri ildə təxminən 18 milyon ton düyü istehsal edən mühüm kənd təsərrüfatı bölgəsidir. Rəsmi qadağaya baxmayaraq, tarlalardakı 20 milyon ton saman və küləş ənənəvi olaraq yandırılır. Həmin dövrdə Dehlidə durğun hava şəraiti hökm sürdüyü üçün havanın çirklənməsi kəskin şəkildə artır. Mütəxəssislərinin fikrincə, belə hava ilə nəfəs almaq gündə 50 siqaret çəkməyə bərabərdir.