Bakı, 17 oktyabr (AZƏRTAC). Milli Məclis Azərbaycan Respublikasının Cəzaların İcrası Məcəlləsində dəyişikliklər etmişdir.

AZƏRTAC xəbər verir ki, bu dəyişikliklərdə ömürlük və ya müəyyən müddətə azadlıqdan məhrum edilmiş şəxslərə yaxınları ilə telefonla danışmağa verilən icazənin sayı artırılmışdır.

Məcəllənin müvafiq maddəsinə edilmiş dəyişiklikdə deyilir ki, müəyyən müddətə azadlıqdan məhrum edilmiş şəxslər həftədə iki dəfə, ömürlük azadlıqdan məhrum edilmiş şəxslər isə həftədə bir dəfə müddəti 15 dəqiqə olmaqla telefonla danışmaq hüququna malikdirlər.

Şəhərlərarası telefon danışıqlarının haqqı məhkumun şəxsi vəsaiti hesabına və ya yaxın qohumları tərəfindən ödənilir. Texniki imkanlar olmadıqda isə bir telefon danışığı bir qısa müddətli görüşlə əvəz edilə bilər.

İntizam xarakterli hərbi hissədə saxlanılan hərbi qulluqçulara da yaxınları ilə ayda iki dəfə telefon danışığına icazə verilir. Məhkumun xahişi ilə uzunmüddətli və ya qısamüddətli görüş telefon danışığı ilə əvəz oluna bilər.

Məcəlləyə edilmiş əlavəyə əsasən telefon danışıqları cəzaçəkmə müəssisəsinin müdiriyyətinin əsaslandırılmış qərarı ilə məhkumların telefon danışıqlarına nəzarət olunacaqdır.