OPEK ÖLKƏLƏRİ NEFT HASİLATINI AZALTMAĞA BAŞLAMIŞLAR
AZƏRTAC xəbər verir ki, ABŞ-ın və Avropa ölkələrinin neftin qiymətinin sabitləşdirilməsi üçün hasilatı artırmaq çağırışlarına baxmayaraq, Neft İxrac edən Ölkələr Təşkilatı (OPEK) neft hasilatını azaltmağa başlamışdır.
“Faynəşnl tayms” qəzetinin yazdığına görə, kartelin 13 aparıcı ölkəsinin gündəlik neft hasilatı fevral ayı ilə müqayisədə martda 0,3 milyon barrel azalaraq, 27,3 milyon barrel olmuşdur. Halbuki yanvarda həmin göstərici 27,8 milyon barrel təşkil etmişdi.
Belə vəziyyət OPEK-in neft hasilatının həcmini dəyişdirməmək haqqında son təminatına baxmayaraq yaranmışdır. Ekspertlərin fikrincə, istehlakçıların və istehsalçıların gələn həftə Romada keçiriləcək forumunda bu məsələ qızğın müzakirələrə səbəb olacaqdır.
Beynəlxalq Enerji Agentliyinin aylıq məruzəsində bildirilir ki, bir sıra mütəxəssislər hasilatın azalmasını Nigeriya və İraqdakı yataqlarda təmir işləri və yaranmış problemlərlə əlaqələndirirlər. Lakin agentlik xəbərdarlııq edir ki, bu meylin yaxın aylarda yalnız güclənəcəyi ehtimal olunur.
Bölmənin digər xəbərləri
