“Ortaq türk keçmişindən ortaq türk gələcəyinə” mövzusunda tədbir keçirilmişdir
Bakı, 25 noyabr (AZƏRTAC). Azərbaycan Milli Elmlər Akademiyasında (AMEA) “Ortaq türk keçmişindən ortaq türk gələcəyinə” mövzusunda VI Uluslararası türk folklor konfransı keçirilmişdir.
AZƏRTAC xəbər verir ki, türk dövlətləri və türk toplumlarının nüfuzlu elm xadimləri, eləcə də bir çox ölkələrin ən məşhur türkoloq alimləri və folklor araşdırıcıları növbəti dəfə Bakıda toplaşmışlar.
Mərasimdə çıxış edən AMEA-nın birinci vitse-prezidenti, akademik Arif Həşimov demişdir ki, 2003-cü ildən ənənəvi olaraq keçirilən bu tədbir türk dünyasının mənəvi birliyinin yaradılmasına xidmət edir.
Türkiyənin Qazi Universitetinin professoru Necati Dəmir və başqaları qeyd etmişlər ki, zəngin türk mənəviyyatını, ortaq mədəni dəyərləri qorumaq, ortaq keçmişimizin dünənindən bu günə, bu günündən də gələcəyə ötürülməsini təmin etmək hazırda çox vacib məsələdir. Bildirilmişdir ki, tədbir ortaq türk mədəniyyətinin formalaşması istiqamətində mühüm mərhələlərdən biridir. Belə yığıncaqların köməyi ilə biri-birimizin folkloru ilə tanış olduqca görürük ki, bizim mənəviyyatımız, folklorumuz, kökümüz də eynidir. Bu, hər bir türk xalqının folklorunda əksini tapmışdır.
İki gün davam edəcək konfransda 100-ə yaxın məruzə dinləniləcəkdir. Eyni zamanda, ortaq türk mədəni abidələrinin öyrənilməsi, ayrı-ayrı türk xalqlarına məxsus folklor nümunələrinin digər dillərdə nəşr edilməsi məsələləri ətrafında fikir mübadiləsi aparılacaqdır.
Bölmənin digər xəbərləri
