“Özbəkistan yığmasını dəstəklədiyinə görə azərbaycanlı futbol azarkeşlərinə minnətdarıq” – DAŞKƏNDDƏ SORĞU
Daşkənd sakinləri milli komandanın futbol üzrə dünya çempionatında matçları ilə bağlı gözləntilərini bölüşüblər
Daşkənd, 18 iyun, AZƏRTAC
Özbəkistan milli komandasının futbol üzrə dünya çempionatında iştirakı son günlərdə ölkədə ən çox müzakirə olunan hadisələrdən birinə çevrilib. Özbəkistan yığması tarixdə ilk dəfə olaraq bu mötəbər turnirdə yarışır və bu fakt stadionlardan kənarda milyonlarla azarkeşi birləşdirib.
AZƏRTAC-ın müxbiri Daşkənd sakinləri ilə söhbət edərək özbəklərin bu əlamətdar turniri hansı hisslərlə qeyd etdiklərini, milli komandadan nə gözlədiklərini və Azərbaycandan olan azarkeşlərə hansı mesajları çatdırmaq istədiklərini öyrənib.
Paytaxtdakı hotelin işçisi Mirabos Mirmahmudov üçün bu dünya çempionatı xüsusi maraqla izlədiyi ilk turnirdir.
O deyir ki, futbol əvvəllər onun həyatında əhəmiyyətli rol oynamayıb, lakin Özbəkistan milli komandasının iştirakı oyuna baxışını tamamilə dəyişib.
“Son nəticənin əhəmiyyəti yoxdur. Əsas odur ki, oğlanlarımız ölkəni dünya səhnəsində ləyaqətlə təmsil etsinlər”, - deyə o əlavə edib və hər matçı izləyəcəyini, milli komandanın uğuruna tam inandığını söyləyib.
Digər sakin – Əlişir də bu mövzuda eyni dərəcədə emosional idi və etiraf edib ki, Özbəkistan milli komandasının dünya çempionatında iştirakı milyonlarla ölkə sakini üçün çoxdankı arzusunun gerçəkləşməsi deməkdir. O qeyd edib: “Futbolçularımızı dünya çempionatında görmək çox xoşdur. Xalqımız bu günü çoxdan gözləyib və nəhayət ki, buna nail olundu. Bu gün oyunları izləyə, komandamıza azarkeşlik edə və ölkəmiz üçün əsl qürur hissi keçirə bilərik. Bu, həqiqətən inanılmaz hissdir”.
Müsahibimizin sözlərinə görə, o, bütün qrup mərhələsi oyunlarını mütləq izləyəcək və milli komandaya azarkeşlik edəcək.
“Biz həqiqətən də uğurlu çıxışa ümid edirik. Özbəkistanı pley-offda mübarizə aparmağa davam edəcək komandalar arasında görmək istərdik. Oyunçularımızın böyük potensialı var və onlar dünyasəviyyəli matç oynaya bilirlər”, - deyə Əlişir qeyd edib.
O, Azərbaycandan olan azarkeşlərə müraciət edərək iki xalq arasındakı xüsusi yaxınlığı vurğulayıb: “Azərbaycanlılar bizim qardaşlarımızdır. Əminəm ki, onlar da komandamıza azarkeşlik edirlər. Bu gün bütün Mərkəzi Asiya Özbəkistanı dəstəkləyir. Bunu hiss etmək çox xoşdur”.
Qazaxıstanın Aktau şəhərindən gələn Andrey də Özbəkistan milli komandasına dəstəyini ifadə edib: “Mütləq Özbəkistana azarkeşlik edəcəyik. Bu, bizim qonşumuz və qardaş xalqımızdır. Azərbaycana – Xəzər sahilində dostlarımıza da salamlarımı göndərmək istəyirəm”.
Özbəkistan Dart Federasiyasının prezidenti Mirşot Şakirov bildirib ki, milli komandanın dünya çempionatına vəsiqə qazanması artıq regional tədbirə çevrilib. Onun sözlərinə görə, Qazaxıstan və Qırğızıstana son səfərləri zamanı dəfələrlə Özbəkistan komandasına səmimi dəstəyin şahidi olub.
“Bu, qürur hissi və böyük məsuliyyətdir. Görürük ki, insanlar təkcə Özbəkistanda deyil, bütün Mərkəzi Asiyada bizə azarkeşlik edirlər. İdman bu gün insanları həqiqətən birləşdirir”, - deyə federasiya rəhbəri vurğulayıb.
Bununla belə, o, heç bir riyazi hesablamanın futbol matçlarının nəticəsini proqnozlaşdıra bilməyəcəyinə əmindir: “Tarixdə çoxlu sensasiya olduğunu bilirik. İdmançılarımıza və möcüzə baş verəcəyinə inanırıq”.
Jurnalist Fatima Şərifova da öz fikirlərini bölüşərək qeyd edib ki, Özbəkistan komandasının dünya çempionatında iştirakı milli arzunun gerçəkləşməsinin rəmzidir. Onun sözlərinə görə, idman millətlər arasında sülh və qarşılıqlı anlaşma üçün həmişə bir vasitə olub. “Sadəcə dünya çempionatında iştirak etmək də böyük bir qələbədir. Bu, insanlara ilham verən və arzuların gerçəkləşdiyini göstərən tədbirdir”, - deyə jurnalist bildirib.
Sorğunun bütün iştirakçıları Özbəkistan və Azərbaycan arasındakı qardaşlıq münasibətlərindən də danışıblar.
M.Şakirov Özbəkistanın yığma komandasını dəstəklərinə görə Azərbaycanın futbol azarkeşlərinə minnətdarlığını bildirib və qeyd edib ki, özbək xalqı da bütün Azərbaycanın bütün uğurlarını ardıcıl olaraq dəstəkləyir.
F.Şərifova isə vurğulayıb ki, Azərbaycan xalqı həmişə Özbəkistanın yanında olub və buna görə də bu gün iki ölkənin azarkeşləri bir-birini səmimi şəkildə dəstəkləyirlər.
Daşkənd sakinləri 2027-ci ildə Azərbaycan və Özbəkistanın ev sahibliyi edəcəyi 20 yaşadək (U-20) futbolçular arasında dünya çempionatına xüsusi diqqət yetiriblər. Respondentlərin əksəriyyəti belə bir turnirə ev sahibliyi etməyi hər iki ölkə üçün böyük nailiyyət hesab edir ki, bu da onların fikrincə, regionun idman potensialını dünyaya nümayiş etdirəcək, turistləri cəlb edəcək və xalqlar arasında dostluğu daha da möhkəmləndirəcək.
Müəllif – Tamilla Məmmədova
Bölmənin digər xəbərləri
