PARİSDƏ ERMƏNİSTAN SƏFİRLİYİNİN QARŞISINDA ETİRAZ AKSİYASI KEÇİRİLMİŞDİR
AZƏRTAC-ın xüsusi müxbiri Fransada nəşr edilən “Ermənistan xəbərləri” qəzetinə istinadla xəbər verir ki, iyunun 20-də Fransada yaşayan ermənilər son dövrlərdə Ermənistanda siyasi vəziyyətin daha da kəskinləşməsinə etiraz əlaməti olaraq bu ölkənin Parisdəki səfirliyinin qarşısında aksiya keçirmişlər.
Aksiya zamanı Ermənistanda siyasi böhranın dərinləşdiyi, hakimiyyət rəsmilərinin özbaşınalığının ölkəni uçuruma apardığı, yeni seçilmiş prezidentin mart hadisələrinin araşdırılması sahəsində ciddi addım atmadığı, sərbəst toplaşmağa icazə verilmədiyi, kütləvi informasiya vasitələrinə təzyiqlər göstərildiyi qeyd olunmuşdur. Aksiya iştirakçıları hökumətdən qısa vaxt ərzində Avropa Şurası Parlament Assambleyasının yaz sessiyasında mart hadisələri ilə bağlı qəbul olunmuş 1609 saylı qətnamədən irəli gələn vəzifələrin yerinə yetirilməsini tələb etmişlər.
Tədbirdə ölkədə iqtisadi vəziyyətin getdikcə ağırlaşması nəticəsində hər il yüz minlərlə erməninin ailəsini dolandırmaq xatirinə Ermənistanı tərk edərək başqa ölkələrdə məskunlaşdığı diqqətə çatdırılmış, həyat səviyyəsinin getdikcə aşağı düşməsinə səbəb olan və dövlət rəsmiləri arasında geniş yayılan korrupsiyanın tüğyan etməsi barədə fikirlər səslənmişdir.
Aksiya iştirakçıları belə halların Ermənistanın gələcəyi üçün qorxulu olduğunu bəyan etmiş və prezidenti ölkəni çulğamış mənfi halların aradan qaldırılması üçün ciddi tədbirlər görməyə çağırmışlar.
Bölmənin digər xəbərləri
