POLİS AKADEMİYASINDA MİLLİ QURTULUŞ GÜNÜ VƏ AZƏRBAYCAN POLİSİNİN 90 İLLİYİ QEYD EDİLMİŞDİR
AZƏRTAC xəbər verir ki, Daxili İşlər Nazirliyinin Polis Akademiyasında 15 iyun - Milli Qurtuluş gününə və Azərbaycan polisinin 90 illik yubileyinə həsr olunmuş tədbir keçirilmişdir. Tədbirdə iştirak edən Milli Məclisin deputatları Fəttah Heydərov və Eldar İbrahimov, akademiyanın rəhbərliyi ümummilli lider Heydər Əliyevin abidəsi önünə əklil qoymuş, Heydər Əliyev irsinin öyrənilməsi üzrə ideoloji mərkəzlə tanış olmuşlar.
Toplantı iştirakçıları qarşısında çıxış edən akademiyanın rəisi, general-mayor Ramiz Nağiyev Milli Qurtuluş günü və Azərbaycan polisinin 90-cı ildönümü münasibətilə şəxsi heyəti təbrik etmiş, 1993-cü ilin iyun hadisələri, Azərbaycan polisinin şanlı tarixi haqqında qısa məlumat vermişdir.
Sonra ölkəmizin suverenliyi, ərazi bütövlüyü uğrunda şəhid olanların, həmçinin xidməti tapşırıqları yerinə yetirərkən həlak olmuş polis əməkdaşlarının xatirəsi bir dəqiqəlik sükutla yad edilmişdir.
Fəttah Heydərov bildirmişdir ki, ötən əsrin 90-cı illərinin əvvəllərində, Azərbaycan Respublikası müstəqilliyinin itirilməsi təhlükəsi ilə qarşılaşdığı bir dövrdə xalqımız bütün ümidlərini ulu öndər Heydər Əliyevə bağladı, bu dahi şəxsiyyətə hərtərəfli dəstək verdi. Məhz ümummilli liderin hakimiyyətə qayıdışı Milli qurtuluş tariximizin əsasını qoymuşdur. Sonrakı illərdə ölkədə çoxşaxəli, köklü islahatlar aparılmış, Avropaya inteqrasiya xətti yürüdən Azərbaycan böyük iqtisadi və siyasi uğurlara imza atmışdır.
Milli Məclisin deputatları akademiyanın əməkdaşlarını və müdavimləri maraqlandıran sualları cavablandırmışlar.
Tədbirin sonunda Qurban Abbasov adına Mədəniyyət sarayının kollektivi şəxsi heyət qarşısında bayram konserti ilə çıxış etmişdir.
######
Bölmənin digər xəbərləri
