Bakı, 12 aprel, AZƏRTAC

“Hamımızın amalı ondan ibarətdir ki, ölkəmiz daha da güclənsin, daha da qüdrətli dövlətə çevrilsin, Azərbaycan vətəndaşları daha da yaxşı yaşasınlar”. Bu sözləri Prezident İlham Əliyev 2018-ci il aprel ayının 11-də andiçmə mərasimində söyləyib.

Hər bir dövlətin daxili siyasətinin prioritet istiqamətlərindən biri də onun sosial siyasətidir. Dövlətimizin başçısı kimi Prezident İlham Əliyevin sosial siyasətinin mərkəzində də vətəndaş rifahının yüksəldilməsi, iqtisadiyyatın dayanıqlı inkişafının təmin edilməsi, əldə olunan iqtisadi uğurların, ilk növbədə əhalinin, onun aztəminatlı təbəqəsinin güzəranının artırılması, sosial müdafiə sisteminin gücləndirilməsi istiqamətində ardıcıl addımların atılması dayanır. Bu siyasətin həyata keçirilməsi məqsədilə dövlətimizin başçısı tərəfindən müxtəlif tədbirlər həyata keçirilib, fərman və sərəncamlar imzalanıb.

Bu sözləri AZƏRTAC-a açıqlamasında Ana Vətən Partiyasının sədr müavini Yalçın Hacızadə söyləyib.

O bildirib ki, əsası ulu öndər Heydər Əliyev tərəfindən qurulmuş sosial siyasətin davamı olaraq, Prezident İlham Əliyev tərəfindən görülən işlər əhalinin ayrı-ayrı qruplarının həyat keyfiyyətinin yüksəldilməsinə, sosial vəziyyətin yaxşılaşdırılmasına yönələn vahid konsepsiyanın tərkib hissəsidir. Azərbaycanın sosial siyasət sahəsində başlıca hədəfi əhalinin bütün qruplarının ədalətli sosial təminatını həyata keçirməklə sosial rifah dövlətinin qurulması idi ki, buna da nail olundu.

Yalçın Hacızadənin sözlərinə görə, dövlətimiz tərəfindən həyata keçirilən sosial siyasət daha geniş və çoxşaxəlidir. Bu siyasət həm bu gün, həm də gələcəkdə vətəndaşlarımızın layiqli həyat şəraitinin təmin edilməsinə, bu təminatın daha da inkişaf etdirilməsinə yönəlib.

“Milli iqtisadiyyatın perspektivi üzrə 2016-cı ildə Azərbaycan Prezidenti tərəfindən qəbul edilmiş “Strateji yol xəritəsi” 2018-ci ildən sonra keçən müddətdə də uğurla həyata keçirilib. Fərmanın icrasının təmin olunması üçün daxili və xarici kapital hesabına yeni iş yerləri açılıb, bazar iqtisadiyyatının sərbəstliyinin qorunması, əlverişli biznes mühitinin inkişaf etdirilməsi üçün şəffaf idarəçilik mexanizmləri formalaşdırılıb.

Yerli və xarici vətəndaşların dövlət orqanlarına müraciətlərinin baxılması, operativ qərarların qəbul edilməsi, sahibkarlıq sahəsində sənədləşmələrin “bir pəncərə” sistemi əsasında həyata keçirilməsi, korrupsiya və rüşvətxorluğun qarşısının alınması, sahibkarlara qarşı süni müdaxilələrin aradan qaldırılması məqsədilə idarəçilik sahəsində Azərbaycan brendi kimi dünyada qəbul edilən “ASAN xidmət” və DOST mərkəzləri yaradılıb və inkişaf etdirilib”, - deyə Y.Hacızadə bildirib.

O diqqətə çatdırıb ki, qlobal pandemiyanın iqtisadi-maliyyə sistemlərinə böyük zərər vurduğu müddətdə ölkədə biznes mühitinin qorunması, sahibkarların məruz qaldığı maddi zərərlərin kompensasiya olunması, aztəminatlı ailələrin maddi vəziyyətinin yaxşılaşdırılması, iş yerlərinin bağlanmasına baxmayaraq əməkhaqlarının ödənilməsi üçün dövlət tərəfindən müxtəlif təbirlər görülüb.

“Prezident İlham Əliyevin 2018-ci ildə növbəti dəfə Prezident seçildikdən sonra həyata keçirdiyi ən böyük uğur otuz ilə yaxın işğalda qalmış torpaqlarımızın Ali Baş Komandan kimi azadlığına nail olmasıdır. Müharibənin böyük xərclərlə müşayiət edilməsinə baxmayaraq, Qələbədən sonra azad olunmuş bölgələrdə daxili və beynəlxalq əhəmiyyətli quruculuq işlərinin aparılmasını, minlərlə şəhid ailələrinə, müharibə iştirakçılarına göstərilən yüksək qayğını bu zamana kimi həyata keçirilmiş uğurlu iqtisadi sosial siyasətin nəticəsi kimi qiymətləndirmək olar”, - deyə Y.Hacızadə əlavə edib.

“Həyata keçirilən siyasət Prezident İlham Əliyevin dediyi kimi, ən önəmli kapital olan insan kapitalı, yəni elm, təhsil sahəsini də əhatə edib. Prezidentin müvafiq sərəncamları ilə doktorantlara, ali təhsil, orta ixtisas və peşə təhsili müəssisələrində, həmçinin Azərbaycan Milli Elmlər Akademiyasının magistratura səviyyəsində təhsil alan tələbələrin təqaüdlərinin artırılması dövlətin təhsilə, elm sahəsinə olan qayğısının bariz nümunəsidir.

Sosial ziddiyyətsiz cəmiyyət, əslində, sosial ədalətli cəmiyyətdir. Bu gün Azərbaycan dövləti tərəfindən sosial ədalətin bərqərar olunması, milli sərvətlərin artırılması və ədalətli bölgüsü istiqamətində müxtəlif proqramlar və layihələr həyata keçirilir. Prezident İlham Əliyevin hakimiyyətə gəldiyi 2003-cü ildən bu günə kimi əməkhaqlarının, pensiyaların, təqaüd və müavinətlərin dəfələrlə artırılması, yoxsulluğun beş faiz həddinə endirilməsi həyata keçirilən proqram və layihələrin uğurlu icrasının göstəricisidir”, - deyə Yalçın Hacızadə fikirlərini yekunlaşdırıb.