PUL SİYASƏTİ ALƏTLƏRİNİN PARAMETRLƏRİNƏ YENİDƏN BAXILMASI HAQQINDA QƏRAR QƏBUL OLUNMUŞDUR
Milli Bankın mətbuat xidmətindən AZƏRTAC-a bildirmişlər ki, qurumun İdarə Heyəti uçot dərəcəsinin 14 faizdən 15 faizədək yüksəldilməsinə, faiz dəhlizinin digər parametrlərinin isə dəyişməz saxlanılmasına, eyni zamanda manatla və xarici valyutada məcburi ehtiyat normalarının 10 faizdən 12 faizədək yüksəldilməsinə dair qərar qəbul etmişdir.
Sıçrayışlı iqtisadi artım, ixrac gəlirlərinin kəskin artması və istifadəsi şəraitində daxili tələbin, o cümlədən kapital və istehlak xərclərinin yüksək sürətlə genişlənməsi ölkədə makroiqtisadi tarazlığın əhəmiyyətli dərəcədə dəyişməsini və qiymətlərin təbii yüksəlişini şərtləndirir. Eyni zamanda, qlobal amillərin daxili makroiqtisadi tarazlığa təsiri güclənməkdədir. Bu şəraitdə kreditlər və depozitlər üzrə real faiz dərəcələrinin azalmağa doğru meyilli olması və iqtisadiyyatın təbii hərarətlənməsi baş verir. Həmin amillər pul siyasətinin baş verən makroiqtisadi proseslərə çevik reaksiyanı zəruri edir.
Bununla əlaqədar Milli Bank pul siyasətinin ardıcıl korreksiyası tədbirlərini həyata keçirir. Artıq cari ildə pul və məzənnə siyasətinə dair bir sıra mühüm qərarlar qəbul edilmişdir.
