“QALA”NIN 5 YAŞINI QEYD ETMİŞLƏR
Yubiley sərgisini qalereyanın direktoru Eldəniz Babayev açaraq, ötən 5 ildə burada həyata keçirilən tədbirlərdən, görülən işlərdən danışdı. O, bildirdi ki, 1998-ci ilin oktyabr ayında “Azərbaycan gənc rəssamların gözü ilə” adlı rəsm sərgisi ilə fəaliyyətə başlayan qalereyada müxtəlif təsviri, dekorativ-tətbiqi, foto-sərgi müsabiqələri, bir çox mədəniyyət layihələri həyata keçirilmişdir. Bundan əlavə, “Qala” rəsm qalereyası 2002-ci ildə rəssamlarımızın həyat və yaradıcılıqlarını əks etdirən təsviri sənət toplusunu, tanınmış fırça ustası, professor, əməkdar rəssam Adil Rüstəmovun qrafika əsərləri əsasında tərtib olunmuş “Azərbaycan və Türkiyə şairləri” adlı albomunu hazırlayıb çap etdirmişdir. Hind, eston, gürcü, Türkiyə, İran, rumın, Rusiya və başqa xarici ölkə rəssamlarının əsərləri də paytaxt sakinlərinə təqdim olunmuşdur.
Ötən illərdə uşaq və gənclərin yaradıcılığına da xüsusi diqqət yetirilmişdir. Bakıda fəaliyyət göstərən uşaq incəsənət məktəbləri ilə sıx əlaqə saxlayan qalereya gənc istedadların üzə çıxarılması ilə bağlı bir sıra tədbirlər həyata keçirmişdir.
Xalq rəssamı, dövlət mükafatı laureatı Tahir Salahov, Bakı şəhər mədəniyyət idarəsinin rəisi Həsənağa Qurbanov, rəssam Adil Rüstəmov və başqaları mərasimdə çıxış edərək yubiley münasibətilə “Qala”nın əməkdaşlarını təbrik etmiş, təsviri sənət əsərlərinin və rəssamlarımızın təbliğində onun xidmətlərindən söz açmışlar.
Sonra qalereyanın 5 illik fəaliyyətini özündə əks etdirən rəsm əsərlərindən ibarət kataloqun təqdimatı olmuşdur.
Bölmənin digər xəbərləri
