QARAMALIN BAŞ SAYININ DAHA DA ARTIRILMASI ÜÇÜN XARİCDƏN CİNS HEYVANLAR GƏTİRİLMİŞDİR
Bakı, 31 iyul (AZƏRTAC). Ötən il heyvandarlığın inkişaf etdirilməsi üçün dövlət büdcəsindən 3 milyon manat pul ayrılmışdı. Bu məbləğin 1 milyon 125 min manatı heyvanların süni mayalanmasına yönəldilmişdir.
Kənd Təsərrüfatı Nazirliyindən verilən məlumata görə, ölkədə qaramalın sayının daha da artırılması üçün xaricdən cins heyvanlar gətirilmişdir.
Lənkəran rayonunun təbii şəraitinə - subtropik iqlimə uyğun olan “Qara-ala” və “Hoctin Frise” cinsləri Almaniyadan gətirilmişdir. Bu cinslər hələ yerli şəraitə alışmadıqları üçün cəmi 3 saat örüşdə olurlar. Xüsusi şəraitdə saxlanılan cins heyvanlar səhər və axşam həkim nəzarətindən keçirilir. Yeni gətirilən cinsdən artıq 7 baş bala alınmışdır.
Bu ilin statistikasına görə, ölkədə 2,5 milyon baş qaramal, 8,5 milyon baş isə davar vardır. Xaricdən gətirilən 176 baş damazlıq inəklərin hər biri 450-500 kiloqramdır. Onlar 62 sahibkara verilmişdir. “Şves” və “Semental” cinsindən olan heyvanların çoxu ətlik üçündür.
Bakı, Sumqayıt və Gəncə şəhərlərinin ətə olan tələbatını ödəmək məqsədi ilə Şamaxı, Salyan, Bərdə və Ağdaş rayonlarından heyvanlar gətirilir və kəsilərək əhaliyə satılır.
Bölmənin digər xəbərləri
