QARDABANİLİLƏR NAKAM HƏMYERLİLƏRİNİN KİTABININ TƏQDİMAT MƏRASİMİNİ KEÇİRMİŞLƏR
AZƏRTAC-ın xüsusi müxbiri xəbər verir ki, iyunun 20-də Gürcüstanın əsasən azərbaycanlılar məskunlaşan Kvemo Kartli-Borçalı bölgəsinin Qardabani rayon mərkəzində həyatdan vaxtsız köçmüş alim İlkin Orucovun “Pərakəndə bank xidmətləri: Dünya təcrübəsi və Azərbaycan” adlı kitabının təqdimat mərasimi keçirilmişdir.
Tədbiri azərbaycanlıların Qardabanidəki mədəniyyət mərkəzi direktorunun müavini Ziyadxan Məmmədov açmış, gənc alimin həyat yolundan, qəfil əcəlin istedadlı gəncin bir çox arzularını yarımçıq qoyduğundan danışmışdır. İ.Orucovun məzunu olduğu Qardabani şəhərindəki 3 nömrəli Azərbaycan orta məktəbinin Şərəf ordenli dil-ədəbiyyat müəllimi Hidayət Yusifov İlkinin orta məktəb illərində yoldaşlarından fərqləndiyini qeyd etmiş və məhz zəhmətsevərliyi sayəsində belə bir əsəri ərsəyə gətirdiyini vurğulamışdır.
Tədbirdə iştirak edən bank sistemi mütəxəssisləri əsərin məziyyətlərindən söhbət açmış, belə bir sanballı əsərin işıq üzü görməsinin İ.Orucovun istedadı sayəsində mümkün olduğunu bildirmişlər.
Təqdimat mərasimində Kvemo Kartli-Borçalı quberniyasının, Qardabani Rayon İcra Hakimiyyətinin məsul işçiləri iştirak etmişlər.
Bölmənin digər xəbərləri
