İQTİSADİYYAT
Qaz İxrac edən Ölkələr Forumunun 7-ci Sammitinə həsr olunmuş veb-sayt istifadəyə verilib
Bakı, 14 fevral, AZƏRTAC
Martın 2-də Əlcəzairin paytaxtı Əlcəzair şəhərində keçirilməsi planlaşdırılan Qaz İxrac edən Ölkələr Forumunun (GECF) dövlət və hökumət başçılarının 7-ci Sammitinə həsr olunmuş veb-sayt fəaliyyətə başlayıb.
AZƏRTAC xəbər verir ki, 2001-ci ildə 10 qaz ixrac edən ölkənin (Əlcəzair, İran, Qətər, Rusiya Federasiyası, Oman, İndoneziya, Malayziya, Türkmənistan, Bruney və Norveç) iştirak etdiyi Tehran görüşündə Qaz İxrac edən Ölkələr Forumunun yaradılması barədə qərar qəbul olunub və təşkilat 2008-ci ildə hüquqi olaraq Moskva şəhərində təsis edilib.
Təşkilatın mənzil-qərargahı 2009-cu ildən Qətər dövlətinin paytaxtı Doha şəhərində yerləşir. Forumun 12 əsas (Əlcəzair, Boliviya, Misir, Ekvatorial Qvineya, İran, Liviya, Nigeriya, Qətər, Rusiya, Trinidad və Tobaqo, Venesuela və BƏƏ) və 7 müşahidəçi (Qazaxıstan, Hollandiya, Norveç, İraq, Oman, Peru və Azərbaycan) üzvü var.
Foruma üzv ölkələrdə dünyanın qaz ehtiyatlarının 70 faizi, boru kəmərləri ilə ticarətin 35 faizi, LNG istehsalının isə 85 faizi cəmləşir.
Forumun əsas məqsədi üzv ölkələrin təbii qaz ehtiyatları üzərində suveren hüquqlarının müdafiəsi imkanlarının sərbəst planlaşdırılması, ekoloji nəticələri nəzərə alan davamlı və effektiv inkişafın təmin edilməsi və qaz ehtiyatlarının xalqların rifahı naminə qorunmasıdır. Bu prosesdə dünya qaz hasilatında müşahidə olunan tendensiyalar tələb və təklifin cari və gözlənilən balansı, qaz sənayesində yeni texnologiyalar və digər qlobal problemlərin təhlili forumun fəaliyyətinin əsas istiqamətlərini təşkil edir.
Azərbaycanın da Qaz İxrac edən Ölkələr Forumuna qoşulması tranzit və ixrac qaz kəmərlərinin tikilməsi, dayanıqlı qaz hasilatının tənzimlənməsi, Xəzəryanı ölkələrin qaz kəmərlərinin bir-biri ilə əlaqələndirilməsinin öyrənilməsi, Xəzəryanı ölkələrin enerji təhlükəsizliyinin təmin edilməsində yeni innovasiyaların tətbiqi, bazar şəraitinin yaradılması baxımından mühüm əhəmiyyət daşıyır.
“Qaz İxrac Edən Ölkələr Forumunun Dövlət və Hökumət başçılarının 7-ci Zirvə görüşü” ilə əlaqədar istifadəyə verilmiş rəsmi veb-sayta bu keçid vasitəsilə daxil olmaq mümkündür: https://algeria7thgecfsummit.dz/