Skarlett Yohansson “Open AI” şirkətini oğurluqda ittiham edib
Stokholm, 21 may, Nərgiz Cəfərli, AZƏRTAC
Skarlett Yohansson “Open AI” şirkətinin Chat GPT süni intellekt xidmətində onun səsinə çox oxşayan səslə səsləndirilən funksiyanı işə salması ilə bağlı məhkəməyə müraciət edəcəyini bildirib. Bu barədə AZƏRTAC xarici mediaya istinadla xəbər verir.
Aktrisa ABŞ mediasına verdiyi açıqlamada keçən il şirkətin chatbot səsləndirmə təklifi ilə ona müraciət etdiyini, lakin bundan imtina etdiyini söyləyib.
Keçən həftə başlayan “Sky” səs botunu eşidən Yohanssonun vəkilləri səsi silmək üçün “Open AI” ilə əlaqə saxlayıblar.
Yohansson deyir: “Səs mənim səsimə o qədər bənzəyir ki, nə ən yaxın dostlarım, nə də xəbər kanalları onu ayırd edə bilmir”.
Şirkət indi xidmətin istifadəçilərinin ünsiyyət qura biləcəyi beş səsdən biri olan səsin səsləndirilməsi funksiyasını dayandırıb. Bununla birlikdə, baş direktor Sem Altman “Sky” səsinin Yohanssonun təqlidi olmadığını, başqa bir peşəkar aktrisaya aid olduğunu bildirib.
Bölmənin digər xəbərləri
