Bakı, 23 avqust (AZƏRTAC). “Akkord Sənaye Tikinti İnvestisiya Korporasiyası” ASC, “Azərbaycan Beynəlxalq Bankı” ASC və “Qazax Sement Zavodu” MMC-nin investisiya layihəsinin ikinci mərhələsi uğurla tamamlanıb.

“Akkord Sənaye Tikinti İnvestisiya Korporasiyası” ASC-nin mətbuat xidmətindən AZƏRTAC-a bildiriblər ki, avqustun 21-də “Qazax Sement Zavodu” MMC-də klinker istehsalına başlanılıb. Zavod carı ilin sentyabr ayının ortalarınadək 70 faiz, oktyabr ayına kimi isə 100 faiz həcmində olmaqla gündəlik 2500 ton klinker və ya il ərzində 1 milyon ton sement istehsal etməyə nail olacaq.

Xatırladaq ki, investisiya layihəsinin birinci mərhələsi 2013-cü ilin iyul ayında başa çatıb. Azərbaycan Respublikasının Prezidenti İlham Əliyevin iştirakı ilə bu investisiya layihəsinin birinci mərhələsinin açılış mərasimi keçirilib.

“Qazax Sement Zavodu” Azərbaycanda, xüsusilə ölkəmizin qərb regionunda reallaşmış ən böyük investisiya layihələrindən biridir. Texniki-iqtisadi əsaslandırılması “Deloitte and Touche” şirkəti tərəfindən hazırlanmış zavodun inşasına yatırılmış investisiyanın ümumi məbləği 225 milyon manat təşkil edir.

Zavodun layihələndirilməsi və inşası işlərini zəngin beynəlxalq təcrübəyə malik “SİNOMA”, proqram təminatını isə “SİEMENS” şirkətləri həyata keçirmişlər. Hazırda zavodda 595 nəfər çalışır. Onların da əsas hissəsini regionun yerli əhalisindən olan insanlar təşkil edir. Zavodda çalışanlara ödənilən orta əmək haqqı 600-700 manat civarındadır.

Müəssisənin ümumi tikinti kompleksinə 49 bina və qurğu daxildir. Bunların 34-ü əsas, 15-i isə yardımçı bina və qurğulardır. Sement istehsalında mineral xammala olan tələbatı ödəmək üçün 452 hektar torpaq sahəsi ayrılıb.

Zavodun istehsalat xəttinin inşasından əlavə ümumi layihə çərçivəsində bir sıra mülki, infrastruktur və enerji obyektlərinin - 8 kilometr avtomobil, 18 kilometr dəmiryollarının tikintisi, 15 kilometr xarici su xətti, 26 kilometr 110 kilovoltluq yüksək gərginlikli xarici elektrik xəttinin çəkilməsi, avtomatik qazpaylayıcı stansiyanın quraşdırılması və 4 kilometr uzunluğunda qaz xəttinin çəkilməsi, suvarma kanalının, sel bəndinin tikintisi və s. işlər həyata keçirilib.

Müəssisənin tikintisi zamanı sosial təyinatlı obyektlərin də inşasına xüsusi diqqət yetirilib. İşçi heyətinin və onların ailə üzvlərinin yaşayış şəraitinin təşkil edilməsi məqsədilə 56 otaqdan ibarət otel, uşaq bağçası, poliklinika, 250 nəfərlik yeməkxana, 69 otaqdan ibarət inzibati bina inşa olunub.

Zavodun ərazisində ümummilli lider Heydər Əliyevin abidəsi ucaldılıb. Burada orijinal layihə əsasında park salınıb. Bu istirahət məkanı müasirliyi ilə diqqəti cəlb edir.

Sement istehsalında istifadə olunan xammalın və hazır məhsulun keyfiyyətinin müntəzəm yoxlanılması üçün zavodda kimyəvi və fiziki laboratoriya quraşdırılıb. Laboratoriyada gips, əhəng daşı, mergel, gil, vulkan külü, klinker və sementin müxtəlif növlərinin kimyəvi, fiziki və mexaniki sınaqları həyata keçirilir.

Müəssisənin istehsal etdiyi sement artıq Azərbaycanın tikinti sektorunda tanınıb və inşaat şirkətləri tərəfindən keyfiyyətli məhsul kimi qiymətləndirilib. Bütün istehsal olunan sement növləri Azərbaycan Respublikasının Standartlaşdırma, Metrologiya və Patent üzrə Dövlət Komitəsi tərəfindən müvafiq qaydada sertifikatlaşdırılıb.

Şirkətin inkişaf planına əsasən, 2014-2017-ci illərdə illik sement istehsalını 3 milyon tona çatdırmaq və müxtəlif növ yeni inşaat materiallarının istehsalını təşkil etmək nəzərdə tutulur. Bu planlara əsasən, “Qazax Sement Zavodu” MMC-də yaradılmış infrastrukturdan və ən son texnologiyalardan istifadə edilməklə ölkənin qərb regionunda iri istehsal texnoparkı yaradılacaq. Artıq bu barədə Azərbaycan Respublikasının İqtisadı İnkişaf və Sənaye Nazirliyinə təkliflər verilib. Həyata keçiriləcək işlər Azərbaycanın inşaat materiallarına olan tələbatının ödənilməsi, ölkəmizin ixrac potensialının artırılması və iqtisadiyyatın qeyri-neft sektorunun daha da gücləndirilməsinə xidmət edəcək.