QƏLƏBƏ GÜNÜNƏ HƏSR OLUNMUŞDUR
Mayın 10-da Azərbaycan Respublikasının Rusiya Federasiyasındaşkı səfirliyində Qələbə günü münasibətilə təntənəli qəbul təşkil olunmuşdur. Ənənəyə görə, qəbulda vaxtılə Azərbaycanda hərbi xidmətdə olmuş generallar və zabitlər, habelə RF Prezidenti İcra Aparatının, XİN-in, hökumətin və digər dövlət və hökumət orqanlarının nümayəndələri iştirak etmişlər. Təntənəli qəbulda Rusiyanın xarici işlər naziri İqor İvanov, Təhlükəsizlik Şurasının katibi Vladimir Ruşaylo, Konstitusiya Məhkəməsinin sədri Marat Baqlay, Ticarət-Sənaye Palatasının sədri Yevgeni Primakov, Federasiya Şurasının üzvü, Rusiya Xalqları Assambleyasının sədri Ramazan Abdulətipov, Rusiya-Azərbaycan Dostluğu Cəmiyyətinin prezidenti Nikolay Baybakov və ziyalıların nümayəndələri də iştirak edirdilər.
Azərbaycanın Rusiyadakı səfiri Ramiz Rizayev təbrik sözündə dedi ki, Qələbə günü istər bütün sovet, istərsə də postsovet məkanı xalqlarının ümumi bayramıdır və o, Azərbaycanda ən hörmətli bayramlardan biri sayılır. O vurğuladı ki, Azərbaycan Prezidenti Heydər Əliyev bu tədbirə hazırlığın gedişi ilə şəxsən maraqlanmışdır. Ramiz Rizayev Prezident Heydər Əliyevin Qələbə günü münasibəti ilə Azərbaycan Respublikasının Rusiya Federasiyasındakı səfirliyində keçirilən ənənəvi qəbulun iştirakçılarına təbrik məktubunu oxudu.
Məktubda deyilir ki, Qələbə gününün Azərbaycanın Moskvadakı səfirliyində hər il bayram edilməsi xöş ənənəyə - vaxtılə Azərbaycanda xidmət etmiş sərkərdələri, habelə siyasətçiləri və diplomatları, elm və mədəniyyət xadimlərini, ümumən, Böyük Vətən müharibəsində həlak olanların xatirəsini əziz tutan bütün insanları toplayan, ölkələrimiz və xalqlarımız arasında dostluq və əməkdaşlığı təcəssüm etdirən gözəl ənənəyə çexrilmişdir. Biz Rusiya ilə Azərbaycan arasında dostluq, strateji əməkdaşlıq və çoxşaxəli qarşılıqlı əməkdaşlığın keyfiyyətcə yeni mərhələsinin şahidləriyik.
Rusiyanın xarici işlər naziri İqor İvanov tədbir iştirakçılarını öz hökuməti adından təbrik edərək bildirdi ki, belə bayramlar xalqlar arasında vahid keçmişi və tarixi əlaqələri xatırladır. O vurğuladı ki, Rusiya Prezidenti Vladimir Putinin və Azərbaycan Prezidenti Heydər Əliyevin səyləri sayəsində ölkələrimizin münasibətləri strateji tərəfdaşlıq səviyyəsinə qalxmış və həmişə necə olmalı idisə, həmin səviyyəyə çatmışdır. O, iki dövlət arasında münasibətlərdə yaranmış müsbət dəyişikliklərdən məmnunluq duyduğunu bildirərək vurğuladı ki, ölkələrimiz tarixi ənənələri əziz tutmalı və bütün sahələrdə əməkdaşlığı möhkəmlətməlidirlər.
Onu da deyək ki, bütün çıxışlarda sovet xalqının Böyük Vətən müharibəsində qazandığı qələbədə Azərbaycanın və onun neftinin çox mühüm rol oynadığı xüsusi vurğulandı.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
