Qlobal çağırışlar dövründə Afrikaya dəstək məsələlərində Qoşulmama Hərəkatının rolu müzakirə olunub
Bakı, 17 may, AZƏRTAC
Mayın 17-də Beynəlxalq Münasibətlərin Təhlili Mərkəzinin təşkilatçılığı ilə "Qlobal Çağırışlar dövründə Afrikanı dəstəkləmək və multilateralizmi tərənnüm etmək: Qoşulmama Hərəkatının rolu" adlı konfrans keçirilib.
AZƏRTAC xəbər verir ki, konfransda çıxış edən Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyev Azərbaycanın Afrika ölkələri, xüsusilə Misir, Mərakeş, Cibuti kimi ölkələr ilə əlaqələrinin çox yaxşı olduğunu deyib, onların bir çox təşkilatlarda bizə dəstək olduqlarını vurğulayıb. 2020-ci ildə İkinci Qarabağ müharibəsində də bir çox Afrika ölkəsinin Azərbaycana dəstək göstərdiyi bildirilib.
Xarici işlər nazirinin müavini Araz Əzimov qeyd edib ki, Azərbaycan dünyada gedən proseslərə öz töhfəsini verən ölkələrdən biridir.
Tədbir Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyevin moderatorluğu ilə " Afrikanı dəstəkləmək - strategiyalar və fürsətlər" adlı panel iclası davam edib.
Paneldə çıxış edən Mərakeş Kralı V Məhəmməd adına beynəlxalq hüquq və münasibətlər universitetinin Professoru Məhəmməd Zəkəriyya Əbuddahab deyib ki, Afrika böyük potensiallar qitəsidir. Bütün bunlara baxmayaraq, qitədə münaqişələr, qeyri-sabitlik var. Böyük güclər tərəfindən bura geosiyasi rəqabətə çevrilib. Afrika ölkələri bir çox təşkilatlara üzvdür və bu problemləri həll etməyə çalışır.
NİDEM-in prezidenti (Malinin inkişafı naminə yeni təşəbbüs) Mali Xəlil Sisse iştirakçıların diqqətinə çatdırıb: “Qloballaşan dünyada bir çox problemlər bizim qitəmizdə baş verir. Koloniyaların qurulması, müstəmləkəçilik, ölkələrin böyük güclər tərəfindən öz mənafeləri üçün istismar edilməsi bu qitənin inkişafını zəiflədir”.
Sonra Zimbabvenin Xarici İşlər və Beynəlxalq Ticarət Nazirliyində beynəlxalq əlaqələr üzrə direktorun müavini Enossent Fidzayi Kiyutsi hazırda Afrikadakı problemlərin əsasını müharibə və təbii fəlakətlər olduğunu deyib. Qeyd edilib ki, bütün bunların həlli üçün institusioallaşma və modernləşmə mütləq olmalıdır. Baş verən problemlərin həlli üçün digər ölkələrin də dəstəyi vacibdir.
Konfrans “Qlobal Çağırışlar dövründə Afrikanı dəstəkləmək: Əməkdaşlıq və tərəfdaşlıq” adlı ikinci panel iclası ilə davam edib.
Bölmənin digər xəbərləri
