Q.TOKAYEV: “ASTANA YENİLİK MÜCƏSSƏMƏSİ, RESPUBLİKAMIZIN MÜSTƏQİLLİK RƏMZİDİR”
AZƏRTAC xəbər verir ki, iyunun 18-də “Şirvanşahlar sarayı kompleksi” Dövlət Tarixi-Memarlıq Qoruq Muzeyində Astana şəhərinin Qazaxıstan paytaxtı elan olunmasının 10 illiyinə həsr edilmiş “Astananın çiçəklənməsi Qazaxıstanın çiçəklənməsidir” adlı fotosərgi açılmışdır. Sərgini Qazaxıstan Senatının sədri Qasım Comərd Tokayev açmışdır.
O demişdir ki, yeni siyasi və inzibati mərkəz kimi Astana ötən 10 il ərzində beynəlxalq aləmdə nüfuzunu xeyli möhkəmləndirmişdir. Astanada həyata keçirilən islahatların sürəti, geniş spektri və sosialyönümlülüyü dünya birliyinin diqqətindən yayınmamışdır. 1999-cu ilin iyulunda paytaxt YUNESKO-nun “Dünya şəhəri” mükafatına layiq görülmüşdür. On ildə şəhərin əhalisi 3 dəfə artmışdır. 2010-cu ilədək burada 1 milyon insanın yaşayacağı gözlənilir. Şəhər əhalisinin orta yaş həddinin 32 olduğunu nəzərə alsaq, Astana təkcə şəhərsalma baxımından deyil, həm də əhalisinin yaşına görə dünyanın ən gənc şəhərlərindən biridir.
Paytaxtın uğurlu iqtisadi inkişafından danışan Q.Tokayev vurğulamışdır ki, 10 ildə Astanada ÜDM 17 dəfə, əsas kapitala yatırılan sərmayələrin məbləği 20 dəfə artmışdır.
Qazaxıstanın paytaxtı turistlərin sevimli məkanıdır. Q.Tokayev demişdir: “Artıq indi Astanaya turist axının bir neçə dəfə artdığını demək olar. Bu gün Astana yeni, dinamik inkişaf edən Qazaxıstanın, respublikanın yeniləşməsinin, müstəqilliyinin rəmzidir”.
Senatın sədri toplaşanları Azərbaycan Parlamentinin 90 illik yubileyi münasibətilə təbrik etmişdir. Sərgi də bu yubiley çərçivəsində keçirilir.
Sərginin açılış mərasimində Milli Məclisin deputatları, dövlət orqanlarının, diplomatik korpusun nümayəndələri, Azərbaycanın siyasi və ictimai xadimləri iştirak etmişlər.
######
Bölmənin digər xəbərləri
