“QUŞ QRİPİ” İLƏ ƏLAQƏDAR DAHA BİR MONİTORİNQ BAŞA ÇATMIŞDIR
Dövlət Baytarlıq Xidmətinin (DBX) mətbuat mərkəzindən AZƏRTAC-a bildirmişlər ki, DBX, Səhiyyə, Ekologiya və Təbii Sərvətlər nazirliklərinin, “Ovçular” Cəmiyyətinin mütəxəssis və əməkdaşlarının iştirakı ilə dekabrın 11-17-də keçirilən monitorinq Abşeron Milli Parkını, Dəvəçi rayonundakı “Sarvan” ovçuluq təsərrüfatını, Salyan rayonundakı “Şirvan”, Ağcabədi rayonundakı “Ağgöl” Milli parklarını, Lənkəran rayonundakı “Qızılağac” Dövlət qoruğunu əhatə etmişdir.
Monitorinq zamanı seçmə üsulla ovlanmış 37 çöl quşundan patoloji material götürülmüşdür. Ərazilərin heç birində ölmüş və ya xəstə quş leşinə rast gəlinməmişdir. Nümunələr müayinə üçün Respublika Baytarlıq Laboratoriyasına verilmişdir.
Həm çöl, həm də ev quşlarından götürülən qan və patoloji materiallar üzərində müayinə işləri dekabrın 25-də başa çatacaqdır.
Xatırladaq ki, sərhədlərdə baytarlıq nəzarəti məntəqələri ciddi iş rejimində fəaliyyət göstərir, rayonların baytarlıq idarələri kifayət qədər dezinfeksiyaedici maddələrlə təmin edilmişdir. Xəstəlik qeyd olunan ölkələrdən quş və quş əti məhsullarının, yem və yem əlavələrinin gətirilməsinə, habelə köçəri quşların ovlanmasına qoyulan qadağa hələ də qüvvədədir.
Bölmənin digər xəbərləri
