RESPUBLİKA GÜNÜ PAKİSTANDA DA QEYD EDİLMİŞDİR
Mayın 28-də Azərbaycanın Pakistandakı səfirliyi İslamabadın “Mariot” mehmanxanasında Respublika günü münasibətilə təntənəli mərasim keçirmişdir. Salonda Azərbaycanın və Pakistanın dövlət bayraqları, Prezident Heydər Əliyevin və Prezident Pərviz Müşərrəfin portretləri asılmışdı. Mərasimdə İslamabaddakı diplomatik korpusun, Pakistanın rəsmi orqanlarının və ölkə ictimaiyyətinin nümayəndələri iştirak edirdilər.
Pakistanın ərzaq və kənd təsərrüfatı naziri cənab Xayır Məhəmməd Junyo ölkə Prezidenti və hökuməti adından Azərbaycan Respublikasının milli bayramı - Respublika günü münasibətilə xalqımızı təbrik etdi.
Respublika gününə həsr olunan qəbulda iştirak edən Pakistanın digər rəsmi şəxsləri də xalqımızı və dövlətimizi bayram münasibətilə təbrik edərək, ümidvar olduqlarını bildirdilər ki, Pakistan Prezidenti cənab Pərviz Müşərrəfin Azərbaycana bu il nəzərdə tutulan rəsmi səfəri iki qardaş ölkənin münasibətlərinin daha da inkişaf etdirilməsində əhəmiyyətli rol oynayacaqdır.
Ölkənin aparıcı qəzetlərindən biri, ingilis dilində nəşr olunan “Pakistan Obsepver “ qəzetinin 28 may nömrəsində səfirliyin təqdim etdiyi materiallar qoşa səhifədə dərc edilmişdir. Qəzetin həmin nömrəsində Azərbaycan Respublikasının Prezidenti Heydər Əliyevin şəkli və tərcümeyi-halı, ölkələrimizin mehriban və qarşılıqlı surətdə faydalı münasibətlərinə dair məqalə, Respublikamızın səfiri Eynulla Mədətlinin Pakistan xalqına müraciəti, Azərbaycanın tarixi, Ermənistan-Azərbaycan, Dağlıq Qarabağ münaqişəsi barədə materiallar dərc olunmuşdur.
Bölmənin digər xəbərləri
