Respublika Pediatriya Mərkəzində Uşaqların Beynəlxalq Müdafiəsi Günü qeyd olunub
Bakı, 1 iyun, AZƏRTAC
Respublika Pediatriya Mərkəzində 1 İyun – Uşaqların Beynəlxalq Müdafiəsi Günü münasibətilə tədbir təşkil olunub.
Bu barədə AZƏRTAC-a Tibbi Ərazi Bölmələrini İdarəetmə Birliyindən (TƏBİB) məlumat verilib.
Bildirilib ki, tədbirdə iştirak edən TƏBİB-in icraçı direktorunun müşaviri Töhfə Cəmilova, Respublika Pediatriya Mərkəzinin direktoru Erkin Rəhimov, Milli Məclisin deputatı, Səhiyyə komitəsinin üzvü İlham Məmmədov, Azərbaycan Pediatriya Cəmiyyətinin sədri Əli Quliyev və digər rəsmi şəxslər çıxış edərək, uşaqların sağlamlığının qorunmasının və pediatrik xidmətlərin inkişafının əhəmiyyətindən danışıblar.
Uşaqların Beynəlxalq Müdafiəsi Gününə həsr olunan tədbirin keçirilməsində məqsəd Uşaq Nevroloji Xəstəxanasında müalicə alan uşaqların asudə vaxtının səmərəli təşkili, onların psixoloji dəstəklənməsi, eləcə də tibb işçilərinin peşəkar inkişafına töhfə verməklə pediatrik xidmətlərin keyfiyyətinin artırılmasına dəstək göstərmək olub.
İki hissədən ibarət olan tədbirin ilk mərhələsində sözügedən tibb müəssisəsində müalicə və reabilitasiya alan uşaqlar üçün xüsusi əyləncə proqramı təşkil edilib. Proqram çərçivəsində köpük şousu nümayiş olunub, müxtəlif personajların iştirakı ilə interaktiv oyunlar və əyləncəli səhnəciklər təqdim edilib. Həmçinin üzboyama fəaliyyəti təşkil olunaraq uşaqların tədbirdə daha fəal iştirakı təmin edilib.
Əyləncə proqramının davamı olaraq personajlar tibb müəssisəsinin şöbələrini ziyarət edərək, şou-proqramda iştirak etmək imkanı olmayan uşaqlar üçün qısamüddətli oyunlar və müxtəlif əyləncəli fəaliyyətlər həyata keçiriblər. Bu təşəbbüs uşaqların bayram sevincini xəstəxana şəraitində də yaşamalarına imkan yaradıb.
Tədbirin ikinci hissəsində “Tibb Personalı üçün İnkişaf Forumu” keçirilib.
Forum çərçivəsində Qarabağ Universitetinin Klinikasının uşaq psixiatrı İkram Rüstəmov, Ə.F.Qarayev adına Uşaq Kliniki Xəstəxanasının həkim-psixoloqu Mahizar Əliyeva, Ailə, Qadın və Uşaq Problemləri üzrə Dövlət Komitəsinin Ailə məsələləri şöbəsinin baş məsləhətçisi Səmra Əliyeva və həkim-psixoloq Cəmilə Rəhimli “Qorxan uşağa necə yaxınlaşmalı?”, “Tükənmişlik sindromu: pediatrlarda görünməyən problem”, “Uşaq evin güzgüsüdür: ailələrin görünməyən tərəfləri” və “Valideynlə kommunikasiya” mövzularında təqdimatla çıxış ediblər.
Sahə mütəxəssislərini bir araya gətirən forum tibb işçilərinin peşəkar bilik və bacarıqlarının artırılmasına, pediatrik xidmət zamanı effektiv kommunikasiya və müasir psixoloji yanaşmaların tətbiqinə dəstək göstərilməsi məqsədi daşıyıb.
“Respublika Pediatriya Mərkəzi uşaqların sağlamlığının qorunması və onlara göstərilən tibbi xidmətlərin keyfiyyətinin yüksəldilməsi istiqamətində fəaliyyətini davam etdirir”, - deyə məlumatda vurğulanıb.
Bölmənin digər xəbərləri
