RƏSUL QULİYEV YENƏ DƏ ERMƏNİPƏRƏST KONQRESMENLƏRDƏN KÖMƏK UMUR
“Hürriyyət” qəzeti 30 iyul tarixli nömrəsində Azərbaycan ictimaiyyətini ADP təmsilçilərinin iqtidarın ünvanına söylədikləri iradların qanuniliyinə inandırmağa cəhd göstərərək, Rəsul Quliyevin “tapdalanmış mənafelərinə ürəkdən yanan tanınmış Amerika konqresmeni Mark Kirkin” çıxışının mətnini dərc etmişdir.
Məsələyə aydınlıq gətirmək üçün, ilk növbədə, Mark Kirkin kimliyi ilə tanış olaq. AZƏRTAC-ın müxbirinin etibarlı mənbələrdən aldığı məlumata görə, bu “demokratiya və ədalət carçısı” ermənilərin tanınmış tərəfdarı Con Porterin tövsiyəsi ilə 2002-ci ildə elə onun yerinə konqresin Nümayəndələr palatasına seçilmişdir. Bundan əvvəl isə uzun illər erməni məsələləri üzrə işçi qrupunun – Ermənistanın ABŞ Konqresindəki de-fakto lobbisinin ən nüfuzlu üzvü olan C.Porterin aparatının rəhbəri işləmişdir.
Mark Kirk özü də həmin qrupa daxildir, ermənipərəst bəyanatlarla müntəzəm çıxış edir. Nümayəndələr palatasının üzvü olduğu 3 ildən də az müddətdə bir sıra ermənipərəst və antitürk qanunvericilik aktlarının təşəbbüsçüsü və müəlliflərindən biri olmuşdur. Güman etmək olar ki, Mark Kirk insan hüquqları üzrə işçi qrupundan istifadə edərək, yenidən Azərbaycanı sancmaq üçün fürsət qazanmış, Milli Məclisin sabiq sədrinin muzdlu lobbiçilərinin fəaliyyəti isə ona bundan ötrü əlverişli imkan yaratmışdır.
Xatırladaq ki, bu, birinci dəfə deyildir. Hələ 2000-2001-ci illərdə bir sıra ermənipərəst əhval-ruhiyyəli konqresmenlər üzdə Rəsul Quliyevin hüquqlarının müdafiə olunmasına, həqiqətdə isə ölkəmizin, müxalifətin guya çox ciddi-cəhdlə təəssübünü çəkdiyi ümumi Vətənimizin mənafeyinə qarşı yönəldilmiş təşəbbüslərlə çıxış etmişdilər. Həmin qətnamələrin və məktubların müəllifləri – konqresmenlər Smit, Pits, Tankreqo və başqaları bu işə Mark Kirkin keçmiş rəhbəri Con Porterlə birlikdə başlamışdılar. İndi isə konqresmen Kirkin özünün şəxsində onların yerinə “Azərbaycan müxalifətinin hüquqlarını müdafiə edən yeni nəsil” gəlmişdir.
Diqqəti çəkən cəhət budur ki, Rəsul Quliyevin lobbiçilərinin səyləri həmişə ABŞ Konqresindəki məhz “möhkəm ermənipərəst qvardiya” arasında dəstək tapır.
Bölmənin digər xəbərləri
